लोडसेडिङको अन्त्य कुलमानले होइन, मैले गर्दा भएको हो : रायमाझी
प्रकाशित मिति : पुस १९, २०७७ आईतबार
उर्जा, जलस्रोत तथा सिँचाइमन्त्री टोपबहादुर रायमाझीले आफैँले गर्दा ऊर्जा क्षेत्रमा देशले ठूलो फड्को मारेको बताएका छन् । गृहजिल्ला अर्घाखाँचीमा प्रेस संगठन नेपालद्धारा आयोजित पत्रकार सम्मेलनमा बोल्दै मन्त्री रायमाझीले आफ्नो पालामा लोडसेडिङ मुक्त गर्ने आधार बनाएपछि देश लोडसेडिङ्ग मुक्त भएको दाबी गरे ।
‘कुलमान घिसिङका कारण देश लोडसेडिङ मुक्त भएको होइन, मैले मेरो पालामा लोडसेडिङ मुक्त गर्ने आधार बनाएपछि देश लोडसेडिङ्ग मुक्त भयो ।’ घिसिङलाई आफूले विद्युत प्राधिकरणमा ल्याएको दावी गर्दै उनले भने, ‘कुलमानजीलाई प्राधिकरणमा मैले ल्याएको हुँ, मैले सही गर्न पाइन, जनार्दनजीले कागजमा सही मात्र गर्नुभएको हो।’
गत वर्षभन्दा यस वर्ष विद्युत क्षमता बढी भएकाले लोडसेडिङ नभइ ओभरलोड भएको उनको भनाई छ । रायमाझीले पुष्पकमल दाहाल ‘प्रचण्ड’ पार्टी फुटाउने र सरकार ढाल्ने काममा लागेको आरोप समेत लगाए । उनले अहिलेसम्म ८ वटा सरकार ढाल्न प्रचण्डको मुख्य हात रहेको आरोप लगाए ।