अमेरिकाका नेपाली महिलाको सहयोगमा थापाथलीमा सुत्केरी र कुरुवालाई तीन महिना निशुल्क भोजन
प्रकाशित मिति : पुस ९, २०७७ बिहीबार
अमेरिकाको न्युयोर्क र आसपासका राज्यमा रहेका नेपाली महिलाहरुको सहयोगमा थापाथलीको प्रसुति गृहमा सुत्केरी हुन आउने महिला र उनका कुरुवालाई झन्डै तीन महिना लगातार पोषणयुक्त निशुल्क भोजन गराइएको छ । नेपाली लेडिज साँझ न्युयोर्कले कोरोनाको महामारीका बीचमा निशुल्क भोजन उपलब्ध गराएको हो ।
न्युयोर्कको ज्याक्सनहाइटमा रहेको क्वीन्स डायमण्ड एण्ड ज्वेलरी र महिला व्यवसायी सूर्य श्रेष्ठ महर्जनको विशेष सहयोग तथा अन्य नेपाली महिलाहरुको थप सहयोगमा नेपाली लेडिज साँझ न्युयोर्कले दुई सय भन्दा धेरै सुत्केरी र कुरुवालाई खाना वितरण गरेको हो । नेपालस्थित बहादुर शाह स्मृति प्रतिस्ठान र कृति फाउन्डेसनको सहकार्यमा एक लाख १० हजार रूपैयाको खाना बितरण गरिएको समेत नेपाली लेडिज साँझ न्युयोर्कले जनाएको छ ।
न्युयोर्क, न्युजर्सी, कनेक्टिकट आसपासमा बस्दै आएका आएका महिलाहरुबीच सम्बन्ध स्थापित गर्न हरेक बर्षको जुन महिनामा नेपाली लेडिज साँझ आयोजना गरिदै आएकोमा पछिल्लो समय यो सामाजिक संस्थाको रुपमा रुपान्तरित भएको छ । सन् २०१२ देखि संचालनमा आएको यो संस्थाले महामारीमा खाना वितरणमा सहयोग गरेकोमा बहादुर शाह स्मृति प्रतिस्ठानका महासचिब स्वर्ण बिक्रम शाहले धन्यवाद दिएका छन् ।
