माधव नेपाल बने नेकपाको नयाँ अध्यक्ष, प्रचण्डले दिए बधाई
प्रकाशित मिति : पुस ७, २०७७ मंगलबार
नेपाल कम्युनिष्ट पार्टी (नेकपा) को नयाँ अध्यक्षमा माधवकुमार नेपाल चयन भएका छन् । बबरमहलस्थित कार्की ब्याङक्वेटमा भएको प्रचण्ड–माधव समूहको केन्द्रीय कमिटी बैठकमा वरिष्ठ नेता झलनाथ खनालको प्रस्तावमा नेपाललाई सर्वसम्मतले अध्यक्ष चयन गरिएको प्रवक्ता नारायण काजी श्रेष्ठ प्रकाशले जानकारी दिए।
यस्तै नेकपा अध्यक्ष पुष्पकमल दाहाल प्रचण्डले पार्टीका नयाँ अध्यक्ष माधव कुमार नेपाललाई बधाई दिएका छन् । मंगलबार बसेको नेकपाको केन्द्रीय समिति बैठकले नेपाललाई अध्यक्षमा चयन गरेसँगै प्रचण्डले पार्टीका अर्का अध्यक्ष नेपाललाई बधाइसँगै सफल कार्यकालको शुभकामना दिएका हुन् ।
यसैबीच अर्को बैठक पुस ९ गतेका लागि तय भएको छ । बैठक ११ बजे कार्की ब्यांकेटमै बस्नेछ ।
आजको बैठकमा ४४७ मध्ये ३१५ जना केन्द्रीय सदस्य सहभागी रहेको प्रवक्ताले बताए । प्रचण्ड- माधव समूहको केन्द्रीय कमिटी बैठकले अध्यक्ष केपी शर्मा ओलीलाई अध्यक्षबाट हटाउने निर्णय अनुमोदन गरेको थियो।
यस्तै, भोलि दिउँसो १ बजे संंसद भवन नयाँ बानेश्वरमा संसदीय दलको बैठक समेत बोलाइएको छ ।