संसद् विघटनको प्रस्ताव फिर्ता लिन दवाव दिने खुमलटार बैठकको निर्णय
प्रकाशित मिति : पुस ५, २०७७ आईतबार
सत्तारुढ नेपाल कम्युनिस्ट पार्टी (नेकपा)का कार्यकारी अध्यक्ष पुष्पकमल दाहाल ‘प्रचण्ड’लगायत शीर्ष नेताहरुले संसद् विघटनको सिफारिस फिर्ता लिन दबाब दिने निर्णय गरेका छन् । आइतबार प्रचण्ड निवास खुमलटारमा बसेको बैठकले हालै अर्का अध्यक्ष एवम् प्रधानमन्त्री केपी शर्मा ओलीले संसद् विघटन गर्न गरेको सिफारिस फिर्ता लिन दबाब दिने निर्णय गरेको हो ।
बैठकमा वरिष्ठ नेताद्वय झलनाथ खनाल, माधवकुमार नेपाल, उपाध्यक्ष वामदेव गौतम र पार्टी प्रवक्ता नारायणकाजी श्रेष्ठ सहभागी थिए ।आइतबार बिहान बसेको मन्त्रिपरिषद्को आकस्मिक बैठकले संसद् विघटनको सिफारिस गर्ने निर्णय गरेको थियो।
देशभर सुरक्षा ‘अलर्ट’
प्रधानमन्त्री केपी शर्मा ओलीले संसद विघटनको सिफारिस गरेपछि सबै सुरक्षा निकायहरू ‘हाई अलर्ट’मा राखिएका छन्। सडकमा आन्दोलन हुने, स्थिति भड्किने र त्यसले कानुनविपरीतका क्रियाकलाप निम्त्याउन सक्ने भएकाले नियन्त्रण गर्न देशव्यापी रुपमा सुरक्षा सतर्कता बढाइएको एक उच्च सुरक्षा अधिकृतले जानकारी दिए ।
‘अन्य अवस्था भन्दा अहिले देश गम्भिर मोडमा छ, जुनसुकै बेला जेपनि हुनसक्छ । त्यसकारण सबै सुरक्षा निकायलाई सतर्क रहन निर्देशन दिइएको छ ।’ ती अधिकृतले भने ।