नेकपा स्थायी कमिटी बैठक बालुवाटार सर्यो, लामाको शोक प्रस्ताव पेश हुने
प्रकाशित मिति : मंसिर २८, २०७७ आईतबार
सत्तारुढ नेपाल कम्युनिष्ट पार्टी (नेकपा) को स्थायी कमिटी बैठक प्रधानमन्त्रीको सरकारी निवास बालुवाटारमा बस्ने भएको छ । आइतबार दिउँसो १ बजे पार्टी केन्द्रीय मुख्यालय धुम्बाराहीमा बस्ने भनिएको बैठक बालुवाटारमा बोलाइएको स्रोतले बताएको छ । यसअघि मंसिर २१ गतेको बैठक धुम्बाराहीमा बसेको थियो ।
आजको बैठकमा पूर्व राजदूत एवम् पूर्व सांसद लामाको निधनमा शोक प्रस्ताव पेश हुनेछ र शोक प्रस्ताव पारित भएसँगै बैठक स्थगित गर्ने बताइएको छ । लामाको गएको मंसिर २४ गते कोरोना संक्रमणबाट मृत्यु भएको थियो ।
बैठकमा अध्यक्ष एवं प्रधानमन्त्री केपी शर्मा ओली पनि सहभागी हुने बताइएको छ । यसअघिको बैठकमा प्रधानमन्त्री ओली उपस्थित भएका थिएनन् । उनले कार्यकारी अध्यक्ष पुष्पकमल दाहाल ‘प्रचण्ड’को प्रस्तावमाथि औपचारिक रुपमा छलफल गर्न नसकिने भन्दै बैठक बहिस्कार गरेका थिए ।