एफडीए सल्लाहकार प्यानलबाट अमेरिकामा फाइजर भ्याक्सिन प्रयोगको स्वीकृति, पक्षमा १७ मत
अमेरिकाको खाद्य तथा औषधी प्रशासनको भ्याक्सिनसम्बन्धि सल्लाहकार प्यानलले कोरोनाबिरुद्धको फाइजर भ्याक्सिन प्रयोगका सन्दर्भमा गरेको मतदानमा स्वीकृति दिने पक्षमा बहुमत आएको छ । सल्लाहकारहरुमध्ये १७ जनाले पक्षमा, ४ जनाले विपक्षमा मतदान गरेका छन् भने एकजना तटस्थ बसेका छन् । एफडीएले अन्तिम स्वीकृति दिएमा यो अमेरिकामा प्रयोगका लागि स्वीकृति पाउने कोरोनबिरुद्धको पहिलो भ्याक्सिन हुनेछ ।
यसअगाडि अमेरिकाको खाद्य तथा औषधी प्रशासन एफडीएले अमेरिकन कम्पनी फाइजरले जर्मन कम्पनी बायोएनटेकसँग मिलेर बनाएको कोरोनाबिरुद्धको भ्याक्सिन सुरक्षित र प्रभावकारी भएको विश्लेषण मंगलबार विहान सार्वजनिक गरेको थियो । एफडीएले फाइजरको भ्याक्सिनमा सुरक्षा सम्बन्धि कुनै जोखिम नरहेको विश्लेषण सार्वजनिक गरेको थियो ।
गम्भिर खालको साइड इफेक्टहरु दुर्लभ रहेको र सामान्य साइड इफेक्टहरुमात्र रहेको जनाइएको छ । भ्याक्सिनपछि सामान्य टाउको दुख्ने लगायतका साइड इफेक्ट भने हुनसक्ने जनाइएको छ ।
भ्याक्सिनको ९५ प्रतिशत प्रभावकारितालाई एफडीएले सुनिश्चित गरेको छ । भ्याक्सिनका दुईवटा डोजहरु दिनुपर्ने र २१ दिनको अन्तरमा दुईवटा डोज प्रदान गरिने भएको छ । एउटामात्र डोजपछि भ्याक्सिनले कोरोना संक्रमण हुनबाट ८२ प्रतिशतसम्म रोक्न प्रभावकारी हुने जनाइएको छ । तर दुबै डोज दिएपछि भने ९५ प्रतिशतसम्म प्रभावकारी हुनेछ ।
अमेरिकाले फाइजरका एकसय मिलियन डोजहरु बुक गरेको छ, जुन ५० मिलियन जनसंख्यालाई लगाउन प्रयाप्त हुनेछ ।
फाइजर र बायोएनटेकको खोपले आनुवंशिक कोडुहरूलाई प्रयोग गरेर रोग प्रतिरोधी प्रतिक्रिया निम्त्याउँछन् र यसलाई एमआरएनए खोप भनिन्छ। यसले मानव कोषमा फेरबदल गर्दैन बरू शरिरलाई कोभिड विरुद्ध प्रतिरोधी हुन तयार रहने हिसाबको निर्देशन दिन्छ।
खोपका कारण रोग लाग्दैन। बरु तोकिए बमोजिमका सङ्क्रमण पहिचान गर्न र त्यससँग जुध्न उनीहरूले हाम्रो शरिरको रोग प्रतिरोधी प्रणालीलाई सिकाउँछन्।
केही व्यक्तिहरूलाई खोप लगाएपछि मांसपेशी दुख्ने वा ज्वरो आउने जस्ता मध्यम खालका लक्षण देखिएको जनाइएको छ । यो रोग नभइ खोपका कारण शरिरमा उत्पन्न प्रतिक्रिया हो। खोपका कारण अरू एलर्जीहरू देखा पर्नु एकदमै दुर्लभ हो।
मोडेर्नाले उत्पादन गरेको भ्याक्सिन प्रयोगको स्वीकृतिका लागि पनि आवेदन दिइएको छ । मोडेर्नाको भ्याक्सिन डिसेम्बरको तेश्रो साता स्वीकृत हुने अपेक्षा गरिएको छ । मोडेर्ना भ्याक्सिन फाइजरको तुलनामा भण्डारण र वितरणमा सहज हुने जनाइएको छ ।
यसैबीच कोरोनाबिरुद्ध फाइजर भ्याक्सिन आम प्रयोगका लागि क्यानडाले पनि स्वीकृत गरिएको छ । बेलायत र बहराइनमा फाइजरको भ्याक्सिनको प्रयोगका लागि स्वीकृति दिए लगत्तै क्यानडाले पनि स्वीकृत गरेको थियो ।
भ्याक्सिनले स्वीकृति पाएपछि अब क्यानडामा अर्कोसातादेखि भ्याक्सिन वितरण गरिने अपेक्षा गरिएको छ । क्यानडाका प्रधानमन्त्री जस्टिन टु्रडोले भ्याक्सिनको स्वीकृतिलाई राम्रो समाचार भन्दै ट्वीट गरेका छन् । कोराना महामारीका कारण क्यानडामा झण्डै १३ हजारको ज्यान गएको छ ।
क्यानडाले यो महिना झण्डै साढे २ लाख डोजहरु प्राप्त गर्ने भएको छ । क्यानडाले बेल्जियमबाट युपीएसमार्फत भ्याक्सिनका डोजहरु प्राप्त गर्ने भएको छ । भ्याक्सिन शुक्रबार आइपुग्ने छ । सोमबारसम्म ३० हजार डोज आइपुग्ने र अरु बाँकी दिनमा आउने जनाइएको छ ।
क्यानडामा अहिलेका लागि १६ बर्ष र त्योभन्दा माथिका व्यक्तिलाईमात्र भ्याक्सिन दिइने भएको छ । भ्याक्सिन निर्माण कम्पनीहरुले क्यानडामा सन् २०२१ भरमा कम्तीमा २० मिलियन र बढीमा ७६ मिलियन डोज भ्याक्सिन सप्लाई गर्ने जनाएका छन् । क्यानडाको जनसंख्या झण्डै ३८ मिलियन रहेको छ । ७६ मिलियन भ्याक्सिन प्राप्त भएमा दुईडोज भ्याक्सिन लगाउन प्रयाप्त हुनेछ ।
बेलायतमा मंगलबारदेखि भ्याक्सिन वितरण सुरु गरिएको छ । ८१ बर्षका विलियम शेक्सपियर र ९१ बर्षकी मार्गरेट क्याननले सुरुमा भ्याक्सिन प्राप्त गरेका थिए ।
