जीवा लामिछानेको ‘देश देशावर’ सार्वजनिक, अमेरिका र क्यानडामा अनलाइनमार्फत अर्डर गर्न सकिने
प्रकाशित मिति : मंसिर ४, २०७७ बिहीबार
लेखक जीवा लामिछानेको नियात्रासङ्ग्रह ‘देश देशावर’ सार्वजनिक भएको छ ।
कोरोनाका कारण कुनै औपचारिक कार्यक्रम नगरी भिडियोमार्फत अक्षरमार्फत संसार घुमाउने यो पुस्तक सार्वजनिक गरिएको हो ।
‘देश देशावर’ मा अफ्रिकी चार देशको युद्ध र शान्ति, विनाश र विकासको कथा पनि उल्लेख छ । जसले एउटै पुस्तक पढेर संसारका धेरै ठाउँबारे जानकारी राख्न चाहन्छ, उसका लागि पु्स्तक उपयोगी हुन सक्ने लेखक लामिछानेले बताए ।
अमेरिका र क्यानडामा बस्ने पाठकहरुले अनलाइनमार्फत पुस्तक अर्डर गर्न सक्नेछन् । अमेरिका र क्यानडामा माइनेपसमार्फत अर्डर गर्नेहरुका लागि पुस्तकको मूल्य १६ अमेरिकी डलर ९९ सेन्टस रहेको छ ।
अमेरिकामा र क्यानडामा बस्नेले पुस्तक प्राप्त गर्न यहाँ क्लीक गर्नुहोला ।
सफलताको कथा : इन्जिनियर बन्ने सपना बोकेर रसिया गएका जीवा बने सफल विजनेशम्यान
‘अक्षरका माध्यमबाट संसार घुमाउने पुस्तक हो– देश देशावर, जसले संसार घुमाउँदै इतिहास सम्झाउँछ र भूगोलको दृश्यचित्र कोरिदिन्छ ।’- पुस्तकको परिचयमा भनिएको छ ।
‘आइसल्यान्डको सुन्दर भूगोल होस् या बर्मुडा ट्र्याङ्गलको तिलस्मी संसार, पुस्तकमा वर्णित दृश्यपरिदृश्यले पाठकलाई ब्याकप्याक बोकेर ती ठाउँको भ्रमणमा जाऊँजाऊँ बनाउँछन् । सँगै जातीय युद्धको विभीषिकाबाट गुज्रिएको रूवान्डा र राष्ट्रवादको फेरो समातेर तानाशाही टिकाएको इदी अमिनको युगान्डाले आफ्नो बिद्रुप इतिहासबाट माथि उठेर जसरी विकासको बाटो हिँडे, नेपालले पनि समृद्धिको बाटो समात्न सक्छ है भन्ने आशा पनि देखाउँछ ।’ – पुस्तकको परिचयमा थप उल्लेख गरिएको छ ।
पुस्तक परिचयमा अझ अगाडि भनिएको छ – ‘पुस्तकमा लेखकले कहिले विभिन्न देशका विशिष्टतासँग आफ्नो देशको स्थिति तुलना गर्छन् त कहिले हामीले पनि यस्तै गर्न पाए भनेर सपना देख्छन् । विश्वका अनेक भाषा, परम्परा, संस्कृति र दृश्यको स्वाद चखाउँदै तीसँग जोडिएका अनुभूतिलाई पनि सूक्ष्म रुपले अभिव्यञ्जित गर्छन् ।’
राष्ट्रिय एवम् अन्तर्राष्ट्रिय व्यवसायमा २५ वर्षभन्दा लामो समयदेखि आबद्ध जीवा लामिछाने गैरआवासीय नेपाली सङ्घ एनआरएनएका संस्थापक सदस्य हुन् । एनआरएनएका पूर्वअध्यक्षसमेत रहेका उनले मस्को स्टेट युनिभर्सिटी अफ सिभिल इन्जिनियरिङबाट स्नातकोत्तर तह उत्तीर्ण गरेका छन् ।
मस्कोबाटै व्यावसायिक यात्रा थालेका उनी सन् २०११ मा प्रधानमन्त्रीको आर्थिक सल्लाहकार परिषद् सदस्यमा समेत नियुक्त भएका थिए । अहिले पनि प्रधानमन्त्री केपी शर्मा ओलीको आर्थिक सल्लाहकार परिषद्मा आबद्ध छन् ।
नेपाली र नेपाली डायस्पोराको क्षेत्रमा पु¥याएको योगदानका लागि उनी नेपाल सरकारले प्रदान गर्ने प्रबल जनसेवाश्रीबाट विभूषित छन् । यात्रा गर्ने र त्यसलाई लिपिबद्ध गर्न रूचाउने लामिछानेले संसारका एक सय ३० भन्दा बढी देश घुमिसकेका छन् ।