अमेरिकामा कोरोना संक्रमितको संख्या ११ मिलियन, न्युयोर्कसिटीमा विद्यालय भोलि पनि खुल्ने


प्रकाशित मिति : कार्तिक ३०, २०७७ आईतबार

अमेरिकामा आइतबारसम्म कोरोना संक्रमितको संख्या ११ मिलियन नाघेको छ । थ्यांक्सगिभिङ नजिकिदै गर्दा कोरोना संक्रमितको संख्या बढेपछि चाडवाड कसरी मनाउने भन्ने सन्दर्भमा मापदण्डहरु घोषणा गरिएको छ ।

अमेरिकामा १ मिलियन संक्रमितको संख्या विगत एकसातामामात्रै पुष्टी भएको हो । विगत ७ दिनदेखि अमेरिकामा संक्रमितको संख्या १ लाखभन्दा बढी पुष्टी हुँदै आएको छ । मोन्टाना, न्यु ह्याम्पशायर, मेरिल्याण्ड, कोलोराडो लगायतका दर्जन बढी राज्यमा संक्रमित संख्यामा शनिबार पनि नयाँ रेकर्ड कायम भएको छ ।

वासिंटन राज्यका गभर्नरले सोमबारदेखि लागु हुनेगरी डिसेम्बर १४ सम्मका लागि रेष्टुरेण्टहरुभित्र खानाखानमा रोक लगाएका छन् । जिम र फिटनेश सेन्टरहरु पनि पूर्णरुपमा बन्दको घोषणा गरिएका छन् । इलिनोयले यस्तै घोषणा गरे लगत्तै वासिंटन राज्यको घोषणा आएको हो । शिकागोमा सोमबारदेखि लागु हुनेगरी ३० दिनसम्म घरभित्रै बस्न आदेश दिइएको छ ।

न्युयोर्कमा राती १० बजेपछि रेष्टुरेण्टहरु बन्द गरिएको छ भने १० जनाभन्दा बढीको भोजभतेर गर्नमा रोक लगाइएको छ । तर न्युयोर्क सिटीका विद्यालयहरु भने सोमबार पनि खुल्ने भएका छन् । न्युयोर्कमा साप्ताहिक संक्रमणदर तीन प्रतिशतभन्दा कम रहेकाले विद्यालयहरु सोमबार पनि खुल्नेछन् ।

विद्यालय बन्द हुनका लागि न्युयोर्कमा संक्रमणदर ३ प्रतिशतभन्दा माथि हुनुपर्ने तय गरिएको छ । न्युयोर्कमा राज्यभरको संक्रमण दर २ दशमलव ४५ प्रतिशत रहेको छ ।

न्युयोर्क सिटीको बु्रकलिनमा सातदिनको औषत संक्रमण दर ३ दशमलव ९२ प्रतिशत रहेको छ । क्वीन्समा औषत संक्रमणदर ३ दमलव ४८ प्रतिशत रहेको छ । न्युयोर्कमा संक्रमणदर केही दिन यता बढ्दै गएको छ ।

शनिबार न्युयोर्कमा कोरोना संक्रमणबाट ३० जनाको मृत्यु भयो भने न्युयोर्कमा अहिलेसम्म मृतकको संख्या २६ हजार १ सय ३३ नाघेको छ । अमेरिकाका अन्य राज्यको तुलनामा जुन सबैभन्दा धेरै हो । अमेरिकाभर मृतकको संख्या २ लाख ४५ हजार नाघेको छ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com