अमेरिकामा शुक्रबार संक्रमित हुनेको संख्या महामारी सुरु भएयताकै धेरै
प्रकाशित मिति : कार्तिक २९, २०७७ शनिबार
अमेरिकामा शुक्रबार कोरोना संक्रमित हुनेको संख्या महामारी सुरु भएयताकै एकदिनको सबैभन्दा धेरै रहेको छ । शुक्रबारमात्र अमेरिकामा १ लाख ८४ हजारलाई संक्रमण पुष्टी भएको थियो । अस्पतालमा भर्ना भएकाहरुको संख्या शुक्रबार ६८ हजारभन्दा धेरै रहेको छ । औषतमा हरेक दिन ११ सय भन्दा धेरैले ज्यान गुमाएका छन् ।
मासाचुसेट्सका गभर्नर चार्ली बेकरले २४० शैयाको नयाँ फिल्ड अस्पतालको पुन स्थापनाको घोषणा गरेका छन् । सुरुमा कोरोनाको महामारी चर्को बनेको बेलामा मासाचुसेट्समा फिल्ड अस्पतालको निर्माण गरिएको थियो । अहिले प्राय हरेक राज्यमा संक्रमितको संख्या बढ्दो रहेको छ ।
अहिलेसम्म २८ वटा राज्यहरुले अनिवार्य रुपमा मास्क लगाउनुपर्ने नियम ल्याएका छन् । जबकी १० वटा राज्यहरुमा अहिलेसम्म पनि मास्क अनिवार्य गरिएको छैन । आइदायोमा मास्क अनिवार्य छैन, गभर्नरले त्यहाँका बासिन्दाहरुलाई कमन सेन्सको प्रयोग गर्न सुझाव दिएका छन् । उनले मास्क लगाउने कुरा व्यक्तिगत उत्तरदायीत्व भएको र आसपासमा अरु व्यक्ति भएको खण्डमा मास्क लगाउनुपर्ने बताएका छन् ।
त्यस्तै ओरेगनका गभर्नरले दुईसातासम्मका लागि जमघट लगायतका गतिविधिमा रोक लगाएका छन् । त्यहाँ कार्यालयहरु सर्वसाधारणका लागि बन्द गर्न र घरबाटै काम गर्न भनिएको छ । जिम, संग्राहालय, बगैचा र चिडियाखानाहरु पनि बन्द गरिएका छन् ।
शुक्रबार राती नर्थ डाकोटाका गभर्नरले मास्क अनिवार्यको नियम घोषणा गरेका छन् । अहिले नर्थ डाकोटामा संक्रमण दर अमेरिकाका सबै राज्यहरुको तुलनामा उच्च रहेको छ । न्युयोर्क सिटीमा सोमबारदेखि विद्यालयहरु बन्द हुनसक्ने जनाइएको छ । मेयर बिल ब्लाजिओले यसबारे अभिभावकहरुलाई सावधानी अपनाउन भनेका छन् । युटाहमा कोरोनाको महामारी बढेपछि आईसीयु बेडहरु भरिएका छन् ।
अमेरिकाभरको बढ्दो संक्रमणदरका कारण जनवरीमा महामारी उच्च तहमा पुग्ने अनुमान गरिएको छ । नवनिर्वाचित राष्ट्रपति जो बाइडेनको कोरोना भाइरस सल्लाहकार बोर्डका सदस्य डाक्टर माइकल ओस्टरहोल्मले दैनिक संक्रमणदर २ लाखसम्म पुग्ने चेतावनी दिएका छन् ।
यसैबीच राष्ट्रपति ट्रम्पले कोरोनाबिरुद्धको फाइजर भ्याक्सिनबारे आशा व्यक्त गर्दै अबको केहीसातामा भ्याक्सिनको प्रयोगका लागि अनुमति दिइने बताएका छन् । फाइजरको प्रारम्भिक तथ्यांक हेर्दा ९० प्रतिशतभन्दा बढी सुरक्षित र प्रभावकारी देखिएको छ ।