डिसेम्बरमा २ करोड अमेरिकनले भ्याक्सिन पाउनसक्ने सरकारी पहलमा संलग्न वैज्ञानिकको भनाई
प्रकाशित मिति : कार्तिक २८, २०७७ शुक्रबार
आगामी महिना २ करोड अमेरिकनहरुले कोरोनाबिरुद्धको भ्याक्सिन प्राप्त गर्नसक्ने अमेरिकी सरकारको भ्याक्सिन पहलमा संलग्न बरिष्ठ बैज्ञानिक मन्सेफ स्लाउइले बताएका छन् । अपरेशन र्याप स्पीडका प्रमुख सल्लाहकार समेत रहेका उनले सन् २०२० को अन्त्यसम्ममा २ करोडले भ्याक्सिन पाउनसक्ने बताएका हुन् ।
शुक्रबार ह्वाइटहाउसमा आयोजित पत्रकार सम्मेलनमा उनले डिसेम्बरमा २ करोड र त्यसपछि हरेक महिना साढे २ करोडदेखि ३ करोड अमेरिकनले भ्याक्सिन पाउनसक्ने बताए । फरबरीको अन्त्यसम्ममा अमेरिकामा रहेका ७ देखि ८ करोडले भ्याक्सिन पाउनसक्ने उनको भनाई छ । आगामी तीनमहिनामा अमेरिकी जनसंख्याको एक चौथाईले भ्याक्सिन पाउने अपेक्षा गरिएको छ ।
सन् २०२१ को अप्रिलसम्म कोरोनाबिरुद्धको भ्याक्सिन सर्वसुलभ रुपमा नै उपलब्ध हुने अमेरिकाका बरिष्ठ सरुवारोग विशेषज्ञ डाक्टर एन्थोनी फाउची लगायतले बताएका छन् । फाउचीले पनि अब छिट्टै भ्याक्सिन उपलब्ध हुने तर कोरोना सम्पूर्णरुपमा निर्मूल भने तत्काल नहुने बताएका छन् ।
सोमबार कोरोनाबिरुद्धको फाइजर भ्याक्सिन ९० प्रतिशत भन्दा बढी सुरक्षित र प्रभावकारी भएको तथ्यांक सार्वजनिक भएको थियो । फाइजरले अबको केहीसातामा प्रयोगका लागि अमेरिकीसरकार समक्ष आवेदन दिने जनाइएको छ । फाइजरले आगामी साता स्वीकृतिका लागि आवेदन दिने अपेक्षा गरिएको छ ।
कोरोनाबिरुद्धको फाइजरको भ्याक्सिन ९० प्रतिशतभन्दा धेरै प्रभावकारी
अमेरिकन कम्पनी फाइजर र जर्मन कम्पनी बायो एन टेक मिलेर बनाएको कोरोनाबिरुद्धको भ्याक्सिन ९० प्रतिशत भन्दा बढी प्रभावकारी भएको निष्कर्ष निकालिएको छ । यो भ्याक्सिनले ९० प्रतिशत बढी लक्षण सहितको संक्रमणको रोकथाम गरेको प्रारम्भिक तथ्यांकमा उल्लेख छ ।
दशौं हजार स्वयंसेवकहरुमा गरिएको परीक्षणबाट यस्तो निचोड निकालिएको हो । यो कोरोनाबिरुद्धको युद्धमा सबैभन्दा उत्साहजनक अग्रता हो । ९४ जना सहभागीमा गरिएको अन्तरिम विश्लेषणका आधारमा यो निष्कर्ष निकालिएको छ । यो परीक्षण १६४ केस हुँदासम्म जारी रहनेछ ।
यो भ्याक्सिनको प्रभावकारिता ६० देखि ७० प्रतिशत हुने अपेक्षा गरिएकोमा ९० प्रतिशत नाघेकोमा फाइजर र बायो एन टेकले उत्साह व्यक्त गरेको छ । अहिलेसम्म बढी उमेरका व्यक्तिमा प्रभावकारितबारे तथ्यांकहरु सार्वजनिक हुन बाँकी छ ।
त्यस्तै सिकिस्तै बिरामी भएकाहरुलाई प्रभावकारी हुने नहुनेबारे पनि अझै तथ्याकहरु सार्वजनिक हुन बाँकी छ । यो चरणको विश्लेषणमा त्यस्ता प्रकारका केसहरु समावेश नभएको जनाइएको छ ।
त्यस्तै मोडेर्नाको भ्याक्सिन पनि सफलताका साथ अगाडि बढीरहेको छ । फाइजरले दुईमहिनाको फ्लोअप डाटासहित यसै महिना अमेरिकामा प्रयोगको स्वीकृतिका लागि आवेदन दिने जनाइएको छ । नोभेम्बरको अन्तिम साता आवेदन दिने अपेक्षा गरिएको छ । प्रभावकारिता यही ढंगले कायम भएमा अमेरिकाले अर्को महिना कोरोनाबिरुद्धका २ प्रकारका भ्याक्सिन प्राप्त गर्नेछ ।
तथ्यांकहरु तयार हुनासाथ सुरुमा आपतकालिन प्रयोगका लागि अमेरिकाको खाद्य तथा औषधी प्रशासन एफडीएसमक्ष आवेदन दिइने छ । एफडीएले भ्याक्सिन सुरक्षित रहेको कम्तीमा दुईमहिनाको तथ्यांक प्राप्त गरेपछिमात्र आपतकालिन अनुमति दिने जनाएको छ ।
विश्वमा अहिले १७० वटाभन्दा धेरै कोरोनाबिरुद्धको भ्याक्सिनहरु पूर्व क्लीनिकल परीक्षणमा रहेका छन् । त्यस्तै १० वटा भ्याक्सिन पहिलो चरणको र १५ वटा भ्याक्सिन दोश्रो चरणको क्लीनिकल परीक्षणमा रहेका छन् ।
कोरोनाको भ्याक्सिन तीब्र गतिमा बनाउने प्रयास भइरहेको छ । जबकी पोलियोको भ्याक्सिन बन्न ७ बर्ष, दादुराको ९ बर्ष, ठेउलाको ३४ बर्ष लागेको थियो ।
यसैबीच कोरोनाबिरुद्धको आष्ट्राजेनेका भ्याक्सिनलाई अनुमति दिन बेलायतले पनि तीब्र पुनरावलोकन सुरु गरिसकेको छ । बेलायतको औषधी तथा स्वास्थ्य सेवा उत्पादन नियामक एजेन्सीले सम्भावित कोरोनाबिरुद्धको भ्याक्सिनको तीब्र पुनरावलोकन सुरु गरिसकेको आष्ट्राजेनेकाका प्रवक्ताले जनाएका हुन् ।
पुनरावलोकनका क्रममा नियामक निकायले भ्याक्सिनको क्लीनिकल तथ्यांकहरु हेर्न सक्नेछन् । साथै स्वीकृति प्रकृया तीब्र पार्न उत्पादन प्रकृया र परीक्षणबारे उत्पादक कम्पनीसँग कुराकानी समेत गर्न सक्नेछन् । आष्ट्राजेनेका भ्याक्सिनको उत्पादन अक्सफोर्ड युनिभर्सिटीसँग मिलेर भइरहेको छ ।
बेलायतको औषधी तथा स्वास्थ्य सेवा उत्पादन नियामक एजेन्सीले फाइजरको कोरोनाबिरुद्धको भ्याक्सिनको पनि तीब्र पुनरावलोकन सुरु गरेको जनाइएको छ ।
बेलायतको अष्ट्राजेनेका भ्याक्सिन बुढाबुढी र जवानहरुमा इम्युन विकाश गर्न सफल भएको कम्पनीले जनाएको छ । यो भ्याक्सिन भाइरल भेक्टर विधिबाट बनाइएको छ ।