भिसा बुलेटिन: डिभी विजेता नेपालीलाई डिसेम्बरमा २७५० केसमा सिमाबन्दी
प्रकाशित मिति : कार्तिक १३, २०७७ बिहीबार
अमेरिकी सरकारको डिपार्टमेन्ट अफ स्टेट ब्यूरो अफ कन्सुलर अफेयर्सले नोभेम्बरको भिसा बुलेटिन जारी गर्दै डिभी विजेता नेपालीहरुलाई नोभेमबरमा २७ सय र डिसेम्बरमा २७५० केसमा सिमाबन्दी गरेको छ । अमेरिकी राष्ट्रपति डोनाल्ड ट्रम्पको कार्यकारी आदेशका कारण चालु आर्थिक बर्ष डिभी विजेताहरुले जनवरी अगाडि भिसा पाउने सम्भावना नभएपनि अमेरिकामा हुनेले भने स्टाटस एड्जस्ट गर्न सक्नेछन् ।
जनवरीपछि भने अक्टोबर, नोभेम्बर र डिसेम्बरमा योग्य ठहर गरिएका केस नम्बर हुनेहरुले प्राथमिकताका आधारमा भिसा पाउन सक्नेछन् । भिसा जनवरी अगाडि प्राप्त नहुने भएतापनि त्यस अगाडिका सबै प्रकृया पूरा गरेर आफ्नो आवेदन भिसा अन्तरवार्ताका लागि तयार राख्न कानुन व्यवसायीहरुले सुझाव दिएका छन् ।
चुनावमा निर्वाचित नभएपनि राष्ट्रपति डोनाल्ड ट्रम्पको कार्यकाल जनवरी २० सम्म कायम रहने भएकाले त्यो अगाडि ट्रम्पले कार्यकारी आदेशको अवधि लम्बाउन सक्नेसमेत सम्भावना रहेको छ । जो बाइडेन निर्वाचित भएमा त्यसपछि ट्रम्पका कार्यकारी आदेशहरु उल्टाउन सक्नेछन् । तर ट्रम्प नै निर्वाचित भएमा भने कार्यकारी आदेश कार्यान्वयनमा कुनै बाधा आउनेछैन ।
पासपोर्ट अनिवार्य गरिएपनि २०२१ को डिभी लोटरी कार्यक्रममा ६ लाख ८८ हजार ५ सय २ जना नेपालीहरु सहभागी भएका थिए । प्राथमिक आवेदन दिने नेपालीहरु ४ लाख २१ हजार ७ सय ६५ जना रहेका थिए । उनीहरुका २ लाख ६६ हजार ७३७ परिवारका सदस्यहरुसहित सहित ६ लाख ८८ हजार ५ सय २ नेपालीहरु सन् २०२१ को डिभी कार्यक्रममा सहभागी भएका थिए ।
उनीहरुले गत बर्षको अक्टोबर २ देखि नोभेम्बर ५ सम्म डिभी लोटरीका लागि आवेदन दिएका थिए । ४ लाख २१ हजार ७ सय ६५ जना आवेदकहरुमध्ये डिभी लोटरीका लागि भने जम्मा ३८०१ जना नेपालीहरु छनौट भएका थिए ।
अहिले आर्थिक बर्ष २०२२ का लागि डिभी लोटरी भर्ने अवधि जारी रहेको छ । न्युयोर्क समय अनुशार अक्टोबर ७ देखि डिभी भर्ने अवधि सुरु भएकोमा नोभेम्बर १० अपरान्ह १२ बजेसम्म डिभी लोटरी भर्न सकिने छ । नतिजा सन् २०२१ को मे ८ मा आउनेछ ।
धेरै मागका कारण वेवसाइटमा समस्या हुनसक्ने भएकाले डिभी भर्न चाहनेहरुलाई अन्तिम समयसम्म नकुर्न सुझाव दिइएको छ । ढिलो दिइएका आवेदन र कागजी आवेदन स्वीकार नगरिने जनाइएको छ । एउटा व्यक्तिले एउटा भन्दा धेरै आवेदन दिए नदिएको चेक गर्न विशेष प्रविधिको प्रयोग गरिने र एउटा भन्दा बढी आवेदन दिएका व्यक्तिको सबै आवेदन रद्द गरिने जनाइएको छ ।