‘निरोगी र जवानले भ्याक्सिनका लागि २०२२ सम्म कुनुपर्ने’ – विश्व स्वास्थ्य संगठन
निरोगी जवान व्यक्तिले २०२२ सम्म कोरोनाबिरुद्धको भ्याक्सिन नपाउनसक्ने विश्व स्वास्थ्य संगठनकी प्रमुख वैज्ञानिक डाक्टर सौम्या स्वामीनाथनले बताएकी छिन् । उनले सुरुमा स्वाथ्य क्षेत्रमा काम गर्नेहरु, अग्रमोर्चामा काम गर्नेहरु र बुढाबुढीहरुले सुरुमा भ्याक्सिन पाउने देखिएको बताएकी छिन् ।
उनले सन् २०२१ सम्ममा विश्वमा कम्तीमा एउटा सुरक्षित र प्रभावकारी कोरोनाबिरुद्ध भ्याक्सिन आउने आशा व्यक्त गरेकी छिन् । तर यो अत्यन्तै सिमित संख्यामा उपलब्ध हुने उनले बताइन् ।
भ्याक्सिनबारे कैयन गाइडलाइनहरु आउने उनले बताइन् । तर जवान र निरोगी व्यक्तिले भ्याक्सिनका लागि २०२२ सम्म कुनुपर्ने आफूलाइै लागेको उनले बताइन् ।
उनले भनिन् – ‘मान्छेहरुले सोंचेका होलान् कि जनवरीमा वा अप्रिलसम्म मैले भ्याक्सिन पाउनेछु, अनि सबैकुराहरु साधारण हुनेछन् । तर यस्तो हुनेवाला छैन ।’
अहिले विश्वमा १० वटाभन्दा धेरै कोरोनाबिरुद्धका भ्याक्सिन अन्तिम चरणको परीक्षणका क्रममा रहेका छन् । अमेरिकामा मोडेर्ना र फाइजरका भ्याक्सिनहरु तेश्रो चरणको क्लीनिकल परीक्षणमा रहेका छन् । बेल्जियमको जोन्सन एण्ड जोन्सन र बेलायतको आष्ट्राजेनेका भ्याक्सिनको पनि तेश्रो चरणको क्लीनिकल परीक्षण भइरहेको छ ।
अमेरिकाले यसबर्षको अन्त्यसम्ममा भ्याक्सिन आउने अपेक्षा गरेको छ । अमेरिकाले भ्याक्सिनका लागि विश्व स्वास्थ्य संगठनसँग सहकार्य नगर्ने बताइसकेको छ । तर पनि अमेरिकामा पनि पहिले जोखिमपूर्ण समुदायलाई भ्याक्सिन दिने तयारी गरिएको छ ।
अमेरिकाले आफै स्वतन्त्ररुपमा नै ६ वटा कम्पनीसँग भ्याक्सिनका करोडौं डोजहरु सुरक्षित गरिसकेको छ । अमेरिकाका उच्च स्वास्थ्य अधिकारीहरुले सन् २०२१ को मध्यसम्म सबै अमेरिकनले भ्याक्सिन पाइसक्ने बताएका छन् ।
विश्व स्वास्थ्य संगठनले भने विभिन्न देशहरुलाई भ्याक्सिन उपलब्ध गराउनका लागि कोभ्याक्स कार्यक्रम सुरु गरेको छ । चीन, बेलायत लगायतका १७० देशहरु यो कार्यक्रममा सहभागी भएपनि अमेरिका भने यसमा सहभागी छैन ।
