न्युयोर्कको एल्म्हर्ष्ट अस्पतालको कम्युनिटी एडभाईजरी बोर्डमा मिलन कुमार शाही नियुक्त
प्रकाशित मिति : आश्विन २१, २०७७ बुधबार
न्युयोर्क सिटी हेल्थ एण्ड हस्पिटल अन्तर्गतको एल्म्हर्ष्ट अस्पताल क्विन्सको कम्युनिटी एडभाईजरी बोर्डमा नेपाली समुदायका मिलन कुमार शाही नियुक्त भएका छन् । अक्टोबर ७, २०२० देखि प्रारम्भ हुने गरी दुई वर्षे कार्यकालको लागि मिलन कुमार शाही सो पदमा नियुक्त भएका छन् ।
यसभन्दा अघि नेपाली समुदायको तर्फबाट दुईजना अस्पतालको कम्युनिटी एडभाईजरी बोर्डमा नियुक्त भएका थिए । विभिन्न समुदायको तर्फबाट अस्पतालको बोर्डमा जम्मा २५ जनालाई नियुक्ति गर्ने प्रावधान छ ।
समुदाय र अस्पतालबीचको सम्बन्धलाई मजबुत बनाउन र उपलब्ध स्वास्थ्य सेवा सम्बन्धि जानकारी समुदाय माझमा पुर्याउनको लागि स्थानीय न्युयोर्क सरकारले समुदायका अगुवामध्येबाट अस्पतालको बोर्डमा नियुक्ति गर्ने प्रचलन छ । नेपाली समुदायको प्रतिनिधि अस्पतालको बोर्डमा नियुक्ति भए पश्चात नेपाली समुदायले अस्पतालबाट अधिकतम सुबिधा प्राप्त गर्न सफल रहेको छ ।
हाल एल्म्हर्ष्ट अस्पतालमा उपचारको क्रममा दोभाषे मार्फत नेपाली भाषा समेत प्रयोग हुने भएकोले आम नेपाली समुदायको निम्ति स्वास्थ्य सेवा लिन सजिलो भएको छ ।
मिलन कुमार शाही नेपालको रुपन्देहीको छपियामा जन्मिएर सन २००३ सालमा डिभी मार्फत स-परिवार अमेरिकाआएका हुन् । उनी रिजवुड नेपाली समाजका उपाध्यक्ष समेत रहेका थिए । शाही हाल ”दर्शन ठकुरी समाज” न्युयोर्कका अध्यक्ष पनि हुन् । लामो समयदेखि न्युयोर्कमा ब्यापार ब्यवसाय गर्दै आएका उनी रियल्टर समेत हुन् ।