इटालियन सिरियल किलर लियोनार्दा: जसले मान्छेको हत्यापछि साबुन बनाएर छिमेकीलाई दिन्थिन्
लियोनार्दा सियानसुलीले आफ्ना बाबुआमाको माया पाइनन् । अहिलेसम्म उनको जन्मदिन कहिले हो भन्ने पनि ठ्याक्कै थाहा छैन । उनकी आमालाई कसैले बलात्कार गरेका कारण बसेको गर्भबाट उनी जन्मिएकी थिइन् ।
लियोनार्दाकी आमालाई त्यही व्यक्तिसँग विहे गर्न बाध्य पारिएको थियो, जोबाट उनी बलात्कृत भइन् । त्यसपछि तिनै बुबाआमाले लियोनार्दालाई हुर्काए । लियोनार्दाकी आमाले आफैलाई बलात्कार गर्ने व्यक्तिसँग विवाह गर्नुपरेकाले पारिवारिक वातावरण राम्रो भएन । लियोनार्दाप्रति उनका बाबुआमाको कुनै माया ममता थिएन ।
बाल्यकालमै लियोनार्दाले दुईपटकसम्म आफ्नो ज्यान आफै लिने प्रयास समेत गरिन् । तर उनको जीवन झन्पछि झन् खराब हुँदै गयो ।
आमाबुबाले एकजना व्यक्तिसँग लियोनार्दाको विवाह गराइदिने योजना बनाइरहेका थिए । तर आमाको इच्छा विपरित लियोनार्दा सन् १९१४ मा एकजना व्यक्तिसँग भागेर विवाह गरिन् । र, उसैसँग इटली बसाई सराई गरिन् । सन् १९३० मा उनीहरुको घर भूकम्पले ध्वस्त भयो । त्यसपछि लियोनार्दाले कोरेजियोमा एउटा सानो पसल खोलिन् ।
विवाह हुनु अगाडि नै एकजना फकिर ज्योतिषले लियोनार्दालाई विवाह हुने र बच्चापनि जन्मिने तर कुनै पनि बच्चाहरु नबाँच्ने भविश्यवाणी गरेका थिए । ज्योतिषले उनलाई जेलजाने समेत भविश्यवाणी गरेका थिए । ज्योतिषको भविश्ववाणीका बाबजुत लियोनार्दा १७ पटक गर्भवती भइन् । १० जना बच्चाहरु जन्मेको केही दिन वा महिनामा मै बिते । ३ पटक गर्भपतन भयो । लियोनार्दा आफ्ना ४ बच्चाहरुको राम्रो रेखदेख गरिरहेकी थिइन् ।
लियोनार्दा असाध्यै रुढीवादी थिइन् । जब उनको एकजना छोराले इटालियन आर्मीमा भर्ना हुने निर्णय गरे, तब उनी आफ्नो छोरालाई बचाउन अरु उपायहरु खोज्न थालिन् । यदि कुनै महिलाको बलि दिएको खण्डमा आफ्नो छोरालाई बचाउन सकिने कुरा उनको दिमागमा आयो ।
त्यसपछि तीनजना महिलालाई उनले निकै होसियारीपूर्वक छनौट गरिन् । कुनै कारण देखाएर उनी आफ्नो स्थानमा तीनैजनालाई ल्याउन सफल भइन् । पहिलो शिकार फस्टिना सेटी आफ्ना हराएका पतिको खोजी गर्दै लियोनार्दाको पसलमा आइन् । लियोनार्दाले ती महिलालाई राम्रो जीवनसाथी खोजिदिएको बताइन् । त्यसपछि उनलाई वाइन खान दिइन् । वाइनमा लागुऔषध मिसाइएको थियो ।
त्यसपछि बेहोस भएकी ती महिलालाई लियोनार्दाले काटेर टुक्राटुक्रा पारेर एउटा ठूलो भाँडोमा राखिन् । यो कुरा लियोनार्दाले आफ्नो व्यक्तिगत संस्मरणमा पनि उल्लेख गरेकी छिन् । उनले ती महिलालाई काटेर भाँडोमा हालेपछि ६ किलो कास्टिक सोडा मिसाइन् । त्यसपछि त्यसलाई घोलेर उनले साबुन बनाइन् । रगतलाई जमेपछि पिठो, चिनी, चोकोलेट, दुध र अण्डासँग मिलाएर चियासँग खाने बिस्कुटहरु बनाइन् । उनलाई भेट्न आउनेहरुलाई पनि उनले खान दिइन् भने केही आफैले पनि खाइन् ।
दोश्रो शिकार थिइन् फ्रान्सेस्का सोभी । स्कुलमा जागिर लगाइदिने भन्दै उनलाई पनि त्यसरी नै बोलाएर उनले साबुन बनाइन् । तेश्रो तथा अन्तिम शिकार थिइन् भर्जिनिया कासिओपो । उनलाई पनि जागिर लगाइदिने प्रलोभनमा बोलाएर बेहोस बनाई काटेर भाँडोमा हालिन् । अनि पकाएर साबुन बनाउन सफल भइन् । उनले साबुनहरु छिमेकीहरुलाई पनि दिइन् ।
तेश्रो शिकार बनेकी महिलाकी भाईबुहारीले भर्जिनिया कासिओपोलाई लियोनार्दाको पसलमा छिरेकी देखेकी रहिछन् । उनैले प्रहरीलाई खबर गरिन् । प्रहरी लियोनार्दाको पसलमा आयो । र, लियोनार्दालाई पक्राउ गर्न सफल भयो । उनलाई बेलैमा पक्राउ गरेकाले अरु धेरैको ज्यान भने जान पाएन । लियोनार्दाले आफ्नो अपराध पनि स्वीकार गरिन् ।
ज्योतिषकै भविश्यवाणी अनुशार लियोनार्दाले ३० बर्ष जेलमा बिताइन् । त्यसपछि ३ बर्ष आपराधिक एसाइलममा राखियो । जहाँ उनको अचानक कुनै रोग लागेर सन् १९७० मा मृत्यु भयो ।
