‘कोरोनालाई सानो नठान्नुहोला तर नआत्तिनुहोला’ : संक्रमणबाट निको भएपछि बरिष्ठ गायक प्रेमराजा
प्रकाशित मिति : भाद्र १२, २०७७ शुक्रबार
अमेरिकाको बाल्टिमोर निवासी बरिष्ठ गायक प्रेमराजा महतले आफूहरु कोरोना संक्रमणमुक्त भएको बताएका छन् । अगस्तको पहिलो साता कोरोना संक्रमण भएपछि घरमै उपचार गराएका प्रेमराजा महत दम्पत्तिले हालैको परीक्षणबाट आफूहरुमा कोरोना नेगेटेभि देखिएको बताएका हुन् ।
कोभिड १९ लाई सानो रोग ठानेर वेवास्ता नगर्न समेत उनले सबैलाई आग्रह गरेका छन् । साथै एकदमै ठूलो ठानेर नआत्तिन समेत उनले आग्रह गरेका छन् । उनले भनेका छन् – ‘यो सानो रोग हैन सानो नमान्नुहोला, ठूलै पनि हैन नडराउनु होला।सावधानी अपनाएमा अवश्य ठीक हुन्छ, लापरवाही गरेमा ज्यानैसमेत लिनसक्छ ।’
विश्वभर रहेका हजारौं हजार ईष्टमित्रहरूको आशिर्वाद र माया प्रेमले आफूहरुलाई हिम्मत दिएको र त्यही हिम्मतले आफूहरुले कोरोनालाई परास्त गर्न सफल भएको उनले बताएका छन् ।
उनले भनेका छन् -‘हजुरहरूकै गहिरो मायाप्रेम ,भगवान पशुपतिनाथ र हाम्रो ईष्टदेबी तनहुं अवस्थित ढोर बाराही माईको कृपा ठानेका छौं । किनकी जुनरोग औषधिबाट निको हुन्छ भन्ने आशै छैन।यस्तो बिषमपरिस्थिति मा हामिलाई आशिर्बाद र शुभकामना दिनुहुने हाम्रा अत्यन्तै प्रियजनहरुप्रति असाध्यै आभारी छौं।’
विश्व स्वास्थ्य संगठन, डाक्टर र नर्सहरुले दिएका सरसल्लाह र नियम पालना गर्न समेत उनले सबैलाई आग्रह गरेका छन् । आफुलाई रोग लागेमा नलुकाउन र सबैलाई जानकारी दिएर सचेतना जगाउन समेत आग्रह गरेका छन् ।
अमेरिकामा अहिलेसम्म सयौं नेपालीहरुलाई कोरोना संक्रमण भइसकेको छ भने अधिकांश निको भइसकेका छन् । कोरोना संक्रमणबाट आधा दर्जन बढी नेपालीको भने ज्यान गएको छ । ज्यान गुमाउनेमा सबैभन्दा बढी न्युयोर्क निवासी नेपालीहरु रहेका छन् ।