दिवंगत पत्रकार बानियाँको परिवारलाई अमेरिकाबाट व्यक्तिगत र संस्थागत पहलमा झण्डै ९ लाख
प्रकाशित मिति : भाद्र ७, २०७७ आईतबार
दिवंगत पत्रकार बलराम बानियाँको परिवारलाई अमेरिकाबाट व्यक्तिगत र संस्थागत पहलमा झण्डै ९ लाख रुपैया सहयोग मिलेको छ । तीन दशकदेखि कान्तिपुर दैनिकमा कार्यरत बानियाले गत अगस्त १० मा बल्खु खोलामा हेलिएर प्राण त्यागेका थिए ।
बानियाँका एकछोरा, एकछोरी र श्रीमति उनीप्रति नै आर्थिक रुपमा आश्रीत रहेकाले परिवारका लागि सहयोग गर्न अमेरिकामा रहेका नेपालीले संस्थागत र व्यक्तिगत रुपमा सहयोग संकलन सुरु गरेका थिए । केहीले रकम हस्तान्तरण गरिसकेका छन् भने केही गर्ने प्रकृयामा रहेका छन् ।
नेजाबाट चारलाख ३१ हजार हस्तान्तरण
नेपाल अमेरिका पत्रकार संघ नेजाले पत्रकार बलराम बानियाको परिवारको सहयोगार्थ संकलन गरेको चारलाख ३१ हजार रूपैयाँ आइतबार नेपाल पत्रकार महासंघका अध्यक्ष गोबिन्द आचार्यले हस्तान्तरण गरे । बानियाको १३ औं दिनको तिथीमा तनहुँको मिर्लुङ्ग स्थित घरमा पुगेर उनको छोरी र छोरालाई रकम हस्तान्तरण गरिएको हो ।
नेजाले आफ्ना सदस्यहरूबीच बानियाको परिवारको सहयोगका लागि आव्हान गरेको थियो । त्यसक्रममा पेपललाइ तिर्नुपर्ने शुल्क कटाएर ३ हजार ६ सय ७८ डलर ५१ सेन्ट नेजाको खातामा संकलन भएको थियो ।
उक्त रकम शनिबार नेजाले नेपाल पत्रकार महासंघलाइ ट्रान्सफर गरेर पठाएको थियो । नेपाल पठाइएको चारलाख ३१ हजार ९ सय ५१ रूपैयाँ महासंघका अध्यक्ष आचार्यले दिवंगत बानियाकी छोरी सुस्मिता बानियालाई हस्तान्तरण गरे ।
सहयोग हस्तान्तरण कार्यक्रममा महासंघका गण्डकी प्रदेश कमिटीका अध्यक्ष त्रिभुवन पौडेल, प्रेस काउन्सिलका कार्यवाहक अध्यक्ष किशोर श्रेष्ठ, सदस्य खिलबहादुर भण्डारी, पत्रकार महासंघ तनहुँका अध्यक्ष ओमकार आचार्य लगायतको उपस्थिति थियो ।
इन्जाबाट सहयोग गर्ने निर्णय
स्वर्गीय पत्रकार बलराम बानियाँका परिवारमा समवेदना सहित ईन्जाका तर्फबाट रू १ लाख सहयोग सहयोग गर्ने निर्णय गरेको थियो । नेपाली पत्रकारहरुको अन्तराष्ट्रिय सञ्जाल इञ्जाले कान्तिपुर बानियाको निधनप्रति गहिरो दुःख व्यक्त गर्दै तत्काल एकलाख रुपैया सहयोग गर्ने निर्णय गरेको थियो ।
बानियाको अन्त्येष्टि र काजकिरियामा परिवारलाई सहयोग पुगोस् भनी तत्कालै आफ्नो आपतकालिन कोषबाट १ लाख रुपैयाँ दिने निर्णय गरेको थियो । उक्त रकम हस्तान्तरण गर्न भने बाँकी रहेको छ ।
देउजाको पहलमा झण्डै साढे ३ लाख संकलन
बानियाँको परिवारलाई सहयोग गर्न न्युयोर्कबाट राधाकृष्ण देउजाले आर्थिक संक्लन अभियान सुरु गरेका थिए । झण्डै एकसाता गोफण्डमी मार्फत चलाइएको उक्त अभियानमा ३ हजार ५० डलर अर्थात् झण्डै साढे ३ लाख नेपाली रुपैया संकलन भएको छ ।
जीवनभर पत्रकार बानियाँको पेशागत इमान्दारिताको सम्मान र सम्झनामा यो अभियान सुरु गरिएको र ३ हजार ५० डलर ९७ सेन्टरस जम्मा भएपछि अभियान बन्द गरिएको देउजाले जानकारी दिए । यो रकम यसैसाता नेपालका पत्रकार टपेन्द्र कार्कीमार्फत बानियाको परिवारलाई हस्तान्तरण गरिने देउजाले जानकारी दिए ।