११ दिनमा कोरोना संक्रमण निको हुने रेम्डिसिभियर नेपाल भित्रिने, कालोबजारी रोकिने अपेक्षा

११ दिनमा कोरोनाको संक्रमितको उपचार गर्न सक्ने र मृत्यु दर घटाउने पुष्टी भएको जीवनरक्षक औषधी रेम्डिसिभियरको कालोबजारी मौलाएपछि नेपालको औषधि व्यवस्था विभागले तीन भारतीय कम्पनीलाई औषधी खरिद गरी ल्याउन स्वीकृति दिएको छ । विभागले भारतीय कम्पनी सिप्ला क्लेम, हिटेरो र माइलानलाई औषधी ल्याउन शुक्रबार स्वीकृति दिएको जनाएको छ । आईभीमार्फत दिइने यो औषधी भाइलमा उपलब्ध छ ।

थप कम्पनीलाई स्वीकृत दिने विषयमा छलफल भइरहेको विभागका महानिर्देशक नारायण ढकालले बताए । ‘हामी फाइल अध्ययन गर्दै छौं, त्यसपछि बाँकी कतिलाई स्वीकृति दिने भन्ने विषयमा निर्णय गर्नेछौं’ –उनले भने । परिस्थिति र आवश्यकताअनुसार रेम्डिसिभियर ल्याउन अनुमति दिने बताउँदै ढकालले बताए । उनले भने – ‘अब केही दिनमै सो औषधी नेपालमा प्रयोग हुनेछ ।’ सरकारमाथि चौतर्फी दबाब आएपछि विभागले औषधि ल्याउने स्वीकृति दिएको हो ।

औषधीको प्रयोगबाट ११ दिनमा संक्रमितहरु निको

एन्टीभाइरल औषधी रेम्डिसिभियर सुरुमा इबोलाको उपचारका लागि बनाइएको थियो तर अहिले उक्त औषधी कोरोनाबिरुद्धको उपचारमा प्रभावकारी देखिएको छ । न्यू इंग्ल्याण्ड जर्नल अफ मेडिसिनमा प्रकाशित रिपोर्ट अनुशार यो औषधीले कोरोनो संक्रमितहरुको उपचार छोटो समयमा गर्न सफल भएको छ ।

अमेरिकाको खाद्य तथा औषधी प्रशासन एफडीएले अप्रिलको अन्तिम साता नै कोरोना भाइरसबिरुद्धको उपचारकालागि रेम्डिसिभियर नामको औषधी प्रयोगलाई आपतकालिन अनुमति प्रदान गरेको थियो । क्लीनिकल अध्ययनको प्रारम्भिक परिणामले यो औषधीको प्रयोगबाट कोरोना भाइरस संक्रमणका बिरामीहरु शीघ्र निको भएको देखाएपछि उक्त एन्टीभाइरल औषधीको प्रयोगका लागि अनुमति दिइएको थियो । कोरोनाबिरुद्ध स्पष्ट सकारात्मक परिणाम दिएको यो पहिलो औषधी बनेको छ ।

यौ औषधी लिएकाहरुलाई ११ दिनमा नै निको भएको पुष्टी भएको छ । परीक्षण अमेरिका, युरोप र एसियाका विभिन्न ६० ठाउँमा १०५९ जना कोरोनाका बिरामीहरुमा गरिएको थियो । ५३८ जना बिरामीहरुलाई औषधीको १० दिनको कोर्स दिइएको थियो । अरु ५२१ जना बिरामीहरुलाई पनि उक्त औषधी दिइएको थियो । ति बिरामीहरुको दैनिक अनुगमन गरेर लक्षणहरु कम भएको नभएको वा कुनै साइड इफेक्ट भए नभएको निरीक्षण गरिएको थियो ।

अमेरिकामा एफडीएको स्वीकृतिपछि कोभिड १९ का अस्पतालमा भर्ना गरिएका बिरामीहरुका लागि औषधी उपलब्ध गराइएको छ । अप्रिलको अन्तिम साता नेशनल एन्स्टीच्युट अफ हेल्थको क्लीनिकल परीक्षणबाट उत्साहजनक परिणाम आएको निष्कर्ष निकालिएको दुईदिनपछि एफडीएले औषधीको प्रयोगको अनुमति दिएको थियो ।

रेम्डिसिभियर नामको औषधीको प्रयोगबाट कोरोना संक्रमित बिरामीहरु ११ दिनमा नै निको भएको नेशनल एन्स्टीच्युट अफ एलर्जी एण्ड इन्फेक्सियस डिजिजको अध्ययनबाट पत्ता लागेको हो । यो औषधी प्रयोग नगरेकाहरु १५ दिनमा निको भएपनि यो औषधी प्रयोग गरेकाहरु ११ दिनमा निको भएका छन् ।

कम्तीमा यो औषधीको ५ दिनको डोज प्रयोग गरिएका ५० प्रतिशत बिरामीमा उल्लेख्य सुधार आएको औषधी उत्पादनकर्ता कम्पनीले यसअगाडिको रिपोर्टमा समेत जनाएको थियो । यस अगाडि यो औषधीको क्लीनिकल परिक्षण कोरोनाबाट अत्यन्तै सिकिस्त भएका ३९७ बिरामीहरुमा गरिएको थियो ।

अहिलेका लागि भने यो औषधी आईभीमार्फत अस्पतालमा भर्ना भएका बिरामीलाईमात्र दिन सकिन्छ । कोरोनाको संक्रमण पुष्टी भइसकेकाहरुलाईमात्र यो औषधी चलाउन अनुमति दिइएको छ ।

नेपालमा रेम्डिसिभियरको कालोबजारी

कोरोना संक्रमितका लागि अति प्रभावकारी मानिएको आईभीमार्फत दिइने यो औषधी नपाउँदा आईसीयू र भेन्टिलेटरमा उपचार गरिरहेका बिरामीको मृत्युदर बढ्न थालेको थियो । औषधी नेपाल भित्रिएपछि पहुँचवाला बिमारीले प्रयोग गर्ने बाटो खुला हुनेछ ।

नेपालमा यो औषधी प्रयोग गर्न नपाउँदा हुनेखानेले विभिन्न एजेन्टमार्फत बढी मूल्यमा खरिद गरी प्रयोग गरिरहेका छन् । यो औषधी एक डोजको करिब ९ हजार रुपियाँ पर्ने अनुमान गरिएको छ । विशेष गरी भारतीय नाका हुँदै प्रमुख शहरदेखि राजधानीसम्म अवैध रुपमा भित्रिएको रेम्डिसिभियरको कहाँबाट कसले ल्यायो भन्ने विषयमा सरकारले अनुगमन गर्न सकेको छैन ।

भारतमा ६ हजार रुपियाँ तिरेर नेपाल भित्र्याएको सो औषधी अति गम्भीर बिरामीले प्रतिडोज ४० देखि ५० हजार रुपियाँ खर्चेर प्रयोग गर्ने गरेका छन् ।

केही दिनभित्र नेपाल आएपछि एक डोजको करिब ९ हजारसम्म पुग्ने औषधि आयातकर्ताले जनाएका छन् । विभागले कतिमा बिक्री गर्ने भन्ने विषयमा मूल्य तय गरेको छैन । महानिर्देशक ढकालले आपत्काल टार्न नेपाल ल्याउन लागिएको रेम्डिसिभियरको यति मूल्य पर्छ भन्ने निक्र्यौल गर्न नसकिने बताए ।

‘स्वीकृत पाएका कम्पनीले ६ हजार ४ सय, ७ हजार ५ सय र ८ हजार रुपियाँसम्मको मूल्य तय गरेका छन्, नेपाल आइपुग्दा त्यसको मूल्य कति पर्छ भन्ने विषयमा निर्णय गर्न बाँकी छ’ –महानिर्देशक ढकालले बताए । भारतमा सरकारी अस्पतालमा उपचाररत बिरामीलाई सरकारले यो औषधी प्रयोग गरिरहेको छ । यो औषधीले कोरोना संत्रमितको मृत्युदर घटाएको छ ।

औषधीको विश्वसनीयता

सोही आधारमा अमेरिका, बेलायत, फ्रान्स, भारतलगायतका मुलुकमा यसको प्रयोग उच्च गतिमा भइरहेको छ । विराट मेडिकल सञ्चालक डाक्टर ज्ञानेन्द्र कार्कीले हवाईजहाज चार्टर गरी नेपाल ल्याएर सो औषधि प्रयोग गरेका थिए । उनले लगायत केही गम्भीर विरामीले रेम्डिसिभियर प्रयोग गरेपछि नेपालमा यस्को विश्वसनीयता बढेको हो । लगत्तै सरकारले औषधि व्यवस्था विभागलाई खरिद गर्न निर्देशन दिएको हो ।

निर्देशनलगत्तै विभागले सूचना जारी गरी आपूर्ति गर्न इच्छुक कम्पनीलाई आह्वान गरेको थियो । नेपाल मेडिकल काउन्सिलले गत मेमा जारी गरेको ‘इन्टरिम क्लिनिकल गाइडेन्स फर कोभिड–१९’ मा कोरोना संक्रमितलाई रेम्डिसिभियर  चलाउन मिल्ने उल्लेख गरेको थियो ।

आपूर्तिकर्ताले नेपालमा आपत्कालन अवस्थामा प्रयोग गर्ने अवस्थामा करिब १० हजार डोज संकलन गरी राख्नुपर्ने बताएका छन् । अहिलेको आपूर्तिकर्ताले कति ल्याउँछन्, सोहीअनुसार भण्डारण गर्ने सरकारको तयारी छ । हाल नेपालमा कोरोनका संक्रमितको संख्या २६ हजार नाघिसकेको छ ।