चाइनिज भ्याक्सिनको उत्साजनक नतिजा, पहिलो र दोश्रो चरणको परीक्षण सफल
प्रकाशित मिति : श्रावण ३०, २०७७ शुक्रबार
चाइनिज कम्पनी सिनोफार्मले बनाइरहेको भ्याक्सिनको प्रारम्भिक नतिजा उत्साहजनक आएको छ । पहिलो र दोश्रो चरणको परीक्षणबाट यो भ्याक्सिन सुरक्षित भएको र कोरोनाबिरुद्ध प्रतिरोध विकाश गर्न सफल भएको निष्कर्ष निकालिएको छ ।
जर्नल अफ अमेरिकन मेडिकल एसोसिएसनमा प्रकाशित रिपोर्ट अनुशार भ्याक्सिनको अन्तरिम नतिजाले भ्याक्सिन सफल हुनेमा आशा जगाएको छ । यद्यपी भ्याक्सिनले व्यक्तिलाई कोरोना संक्रमणबाट जोगाउने अन्तिम निष्कर्ष निकाल्न भने थप अध्ययन र परीक्षण आवश्यक रहेको शोधकर्ताहरुले बताएका छन् ।
पहिलो चरणको परीक्षण चाइनाको हेनान प्रान्तमा ९६ जनामा गरिएको थियो । उनीहरुलाई भ्याक्सिनमा उच्च, मध्यम र न्यून डोजहरु दिइएको थियो । दोश्रो चरणको परीक्षणमा भने २२४ जनालाई मध्यम डोजहरु दिइएको थियो ।
परीक्षणमा सहभागीमध्ये १५ प्रतिशतमा एकसातामै भ्याक्सिनको असर देखिएको थियो । भ्याक्सिनबाट लगाएको ठाउँमा सामान्य दुखाई र ज्वरोबाहेक अरु साइड इफेक्टहरु नदेखिएको जनाइएको छ । सबै साइड इफेक्टहरु सामान्य रहेको र उपचारको जरुरत नपर्ने खालको रहेका थिए ।
दोश्रो चरणको परीक्षणमा ९७ दशमलव ६ प्रतिशतमा भ्याक्सिनले कोरोनाबिरुद्ध एन्टीबडी तयार गर्न सफल भएको थियो । पहिलो डोजको दुईसाताको तुलनामा तीनसातापछि दोश्रो डोज दिंदा भ्याक्सिनको प्रभावकारिता बढेको थियो ।
विश्व स्वास्थ्य संगठनका अनुशार अहिले विश्वभर २९ वटा भ्याक्सिनको परीक्षण भइरहेको छ । अमेरिकी सरकारले ६ वटा भ्याक्सिनलाई आर्थिक सहयोग गरिरहेको छ । अमेरिकामा दुईवटा भ्याक्सिनहरु अन्तिम चरणको क्लीनिकल परीक्षणमा गइसकेका छन् ।