प्रदेश ५ को सामाजिक विकास मन्त्रालय स्वास्थ्य महाशाखा प्रमुख डा. चौधरीलाई कोरोना संक्रमण
प्रकाशित मिति : श्रावण ३०, २०७७ शुक्रबार
प्रदेश ५ सामाजिक विकास मन्त्रालयका स्वास्थ्य महाशाखा प्रमुख उमाशंकरप्रसाद चौधरीलाई कोरोना संक्रमणको पुष्टि भएको छ । प्रदेश ५ को कोरोना भाइरसबारेमा दैनिक मिडिया ब्रिफिङ सञ्चालन गर्दै आएका उनी आफैले सामाजिक सञ्जाल मार्फत कोरोना भाइरसको संक्रमण भएको बताएका छन्। उनलाई कोरोना भाइरस संक्रमण पुष्टि भएपछि मन्त्रालयमा सर्वसाधारणलाई प्रवेश निषेध गरिएको छ ।
डा. चौधरीले आफुलाई कोरोना संक्रमण भएको र स्वास्थ्य अवस्था सामान्य रहेको बताउँदै २ हप्ता होम आइसोलेशनमा बस्ने जानकारी गराएका छन्। डा. चौधरीमा कोरोना संक्रमण देखिएपछि मन्त्रालयको मुल गेट बन्द गरि उनका सम्पर्कमा आएका सामाजिक विकास मन्त्री सुदर्शन बरालका साथै अन्य कर्मचारीको समेत स्वाब संकलन गरिएको छ। मन्त्री बरालको रिपोर्ट नेगेटिभ आएको र अन्यको स्वाव संकलन गर्ने कार्य भैरहेको मन्त्रालयले जनाएको छ ।