अमेरिकाको मिनेसोटामा डूबेर मृत्यु भएका व्यक्ति बिराटनगरका २४ बर्षीय युवा आशुतोष
प्रकाशित मिति : श्रावण २०, २०७७ मंगलबार
अमेरिकाको मिनेसोटामा डूबेर मृत्यु भएका व्यक्ति बिराटनगरका २४ बर्षीय युवा आशुतोष दाहाल रहेको पुष्टी भएको छ । हालै सेन्ट क्लाउड स्टेट युनिभर्सिटीबाट ग्रयाजुएट भएका दाहालको मिनेसोटामा रहेको बिग लेकमा डूबेर मृत्यु भएको हो ।
शनिबार बेलुका पौने ८ बजेतिर तालमा गएका उनी ट्युबबाट खसेर पानीमा डूबेको प्रत्यक्षदर्शीहरुले बताएका छन् । कैयन व्यक्तिले उनलाई बाहिर निकाल्न खोजेपनि असफल भएका थिए ।
राती साढे ९ बजेतिर प्रहरीले उनलाई बाहिर निकाल्दा उनी अचेत अवस्थामा थिए । पछि उनलाई मृत घोषणा गरिएको थियो । उनको शरिर पानीमा झण्डै १० फिट तल भेटिएको थियो ।
एसोसिएसन अफ नेपलिज इन मेनोसोटाले अन्तिम संस्कारका लागि सघाउन आर्थिक संकलन अभियान सुरु गरेको छ । आर्थिक सहयोग गर्न चाहनेले यो लिंकमा क्लिक गरेर पेपलमार्फत सहयोग गर्न सकिनेछ ।
उनको मृत्युबारे परिवारका सदस्यहरुलाई खबर गरिसकिएको जनाइएको छ । अमेरिकामा केहीदिन यता नेपालीहरु डूबेर मृत्यु भएका कैयन खबरहरु आइरहेका छन् ।