समुदायलाई सघाउन न्युयोर्कका तीन नेपाली लायन्स क्लबहरु एकजुट, संयुक्त सञ्जाल निर्माण


प्रकाशित मिति : श्रावण १९, २०७७ सोमबार

कोरोना प्रभावितलाई सहयोग गर्न न्युयोर्कको क्वीन्समा सकृय तीनवटा लायन्स क्लबहरुको संयुक्त सञ्जाल बनाइएको छ । लायन्स क्लब अफ क्वीन्स बुद्ध, नेपालिज र केटिअमको संयुक्त पहलमा कोरोनाको महामारीबाट पीडितलाई राहत र सहयोगको उद्देश्यले  नेपाली लायन्स नेटवर्क न्युयोर्कलाई पुनर्गठन गरिएको हो ।

संयुक्त बैठकले सञ्जालको नयाँ संयोजक लायन्स क्लब क्वीन्स बुद्धबाट संस्थापक अध्यक्ष कृष्ण आचार्यलाई चयन गरेको छ । त्यस्तै लायन्स क्लब केटीएमबाट अशोक कार्कीलाई कार्यक्रम संयोजक र लाईन्स क्लब नेपालिजबाट अच्युत सिग्देललाई सचिवमा चयन गरिएको छ ।

कोरोनाको महामारी र अन्य मानवीय सेवाका लागि नेपाली लायन्स क्लबहरूको एकीकृत र समन्वयात्मक सहकार्यलाई दीर्घकालसम्म निरन्तरता दिन संयुक्त सन्जालको पुनर्गठन गरिएको जनाइएको छ । उक्त संजाल कोरोना पीडित समुदायलाई सेवा र सहयोगका लागि गत मार्चमा बनाइएको थियो ।

नेपाली समाजमा सञ्जालमार्फत गरिएको सहयोग प्रभावकारी रहेको भन्दै त्यसलाई थप व्यवस्थीत र निरन्तरताका लागि पुनगर्ठन गर्न सबै नेपाली लायन्स क्लबहरू एकमत र एकजुट भएका हुन् ।

न्युयोर्कमा स्थापित समान संस्थागत उद्देश्य बोकेका तीनवटै सक्रिय नेपाली लायन्स क्लबहरूले नेपाली समुदायका साझा सवालहरूमा उपलब्ध स्रोत साधनको समन्वय र परिचालनसहित एकआपसमा मिलेर कार्यक्रम गर्दै जाने प्रतिबद्धता व्यक्त गरेका छन् ।

नवगठित नेपाली लायन्स सञ्जालले रक्तदान र जनगणना जागरण कायैक्रम तत्काल आयोजना गर्ने निर्णयसमेत गरेको छ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com