कोरोनाबाट बच्न मास्कका साथमा गगल्स पनि लगाउन डाक्टर फाउचीको सुझाव
प्रकाशित मिति : श्रावण १५, २०७७ बिहीबार
अमेरिकामा बरिष्ठ सरुवा रोग विशेषज्ञ डाक्टर एन्थोनी फाउचीले कोरोनाको संक्रमणबाट बच्न मास्कका अतिरिक्त फेसशिल्ड वा गगल्स लगाउन सुझाव दिएका छन् । मास्कका अतिरिक्त गगल्स वा फेसशिल्ड लगाउँदा कोरोनाको संक्रमणबाट बच्न थप मद्दत पुग्ने उनको भनाई छ ।
सैद्धान्तिक रुपमा आँखा, नाक र मुख छोप्नुपर्ने भएकाले आफूसँग भएको खण्डमा गगल्स लगाउन उनले सुझाव दिएका हुन् । सीडीसीले यसअगाडि नै मुख र नाक छोप्नेगरी मास्कको प्रयोग गर्न सुझाव दिइसकेको छ तर भाइरस आँखाको माध्यमबाट पनि सर्नसक्ने चेतावनी दिइएको छ ।
गगल्सको प्रयोग विश्वब्यापी रुपमा सिफारिस गरिएको नभएतापनि गगल्स वा फेसशिल्ड समेत लगाउँदा पूर्णरुपमा संरक्षण हुने फाउचीको भनाई छ । चिसो सुरु हुँदै गर्दा उनले फ्लुको भ्याक्सिन लगाउन समेत सुझाव दिएका छन् ।
नाक र मुखमा जस्तै आँखामा पनि म्युकोसल हुने भएकाले सबै म्युकोसल सतहलाई छोप्नुपर्ने फाउचीको तर्क छ । मास्क लगाउँदा कोभिड १९ बाटमात्र नभई अरुप्रकारका फ्लुबाट पनि बच्न सकिने उनले बताएका छन् ।