एनआरएनए न्युयोर्क च्याप्टरको आयोजनामा नेपाली समुदायको १२ बर्षयताकै ठूलो रक्तदान


प्रकाशित मिति : श्रावण १४, २०७७ बुधबार

एनआरएनए न्यूयोर्क च्याप्टरले आयोजना गरेको रक्तदान कार्यक्रममा १३० जनाले रक्तदान गरेका छन् । न्युयोर्कको सत्य नारायण मन्दिरमा आयोजित रक्तदान कार्यक्रममा १ सय ३० पिन्ट रगत संकलन भएको छ ।

रक्तदान न्युयोर्कमा क्रियाशिल अन्य ४८ ओटा संघ संस्थाहरूको विशेष सहयोग र न्युयोर्क ब्लड सेन्टर सँगको सहकार्यमा सम्पन्न भएको हो । यो न्युयोर्कमा नेपाली समुदायका आयोजनामा सन् २००८ यताकै सबैभन्दा ठूलो रक्तदान कार्यक्रम भएको जनाइएको छ ।

कार्यक्रममा नेपाल भिजन इन्कले रक्तदाताहरुलाई पीपीई, मास्क, ग्लोभ्स र सेनिटाईजर वितरण गरेको थियो । त्यस्तै अमेरिकी जनगणनाको फारम भर्न सेन्सन ब्यूरोका प्रतिनिधि र अधिकारका प्रतिनिधिहरुले सहयोग गरेका थिए । निःशुल्क स्वास्थ्य जाँच र अस्पतालले दिने सेवाहरूको बारेमा जानकारी दिन एल्महस्र्ट अस्पतालका मेडिकल टिम उपस्थीत थिए ।

एनआरएनए न्युयोर्क च्याप्टरका युवा संयोजक विजय गुरुङको संयोजकत्वमा कार्यक्रम भएको हो । नेपाली महावाणिज्य दूतावास न्युयोर्कमा कार्यरत वाणिज्यदूत गणेश प्रसाद अधिकारीले कार्यक्रमको उदघाटन गरेका थिए ।

कार्यक्रममा एनआरएनए एनसीसी अमेरिकाका उपाध्यक्ष बाबुराम लामा चर्चित रक्तदाता अर्जुन मैनाली लगायत विभिन्न संघ संस्थाहरूका अध्यक्षहरू तथा प्रतिनिधिहरू सहित ३०० जना भन्दा बढीको उपस्थीति रहेको थियो ।

कार्यक्रममा सहभागी हुने र रक्तदान गर्ने सबैलाई एनआरएन न्युयोर्क च्याप्टरका अध्यक्ष रामहरि अधिकारीले वक्तब्य मार्फत धन्यवाद दिएका छन् ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com