अपराधका संरक्षक न्यायाधीशमाथि महाभियोग लगाऊँ : डा.बाबुराम भट्टराई
प्रकाशित मिति : श्रावण ९, २०७७ शुक्रबार
जनता समाजवादी पार्टीका नेता तथा पूर्वप्रधानमन्त्री डा.बाबुराम भट्टराईले देश गम्भीर संकटतर्फ गएकाे बताउनुभएकाे छ । शुक्रवार बिहान सामाजिक सञ्जाल ट्वीटरमा उहाँले देश गम्भीर संकटतर्फ गएकाे बताउनुहुँदै पाँच सुझाव पेश गर्नुभएकाे छ ।
भट्टराईले सशस्त्रका पूर्व डिआइजी रञ्जन कोइरालालाई सजाय छुट दिएकोमासमेत असन्तुष्टि जनाउनुभएकाे छ । उक्त घटनाप्रति लक्षित गर्दे बाबुरामले न्यायाधीशलाई महाभियोग लगाउन समेत सुझाव दिनुभएकाे छ । उहाँले लेख्नुहुन्छ-‘अपराधका संरक्षक न्यायाधीशमाथि महाभियोग लगाऊँ ।’
सर्वोच्च अदालतका प्रधानन्यायाधीश चोलेन्द्र शम्शेर राणा र न्यायाधीश तेजबहादुर केसीको संयुक्त इजलासले पत्नीको ज्यान मारेर शवसमेत जलाएका सशस्त्रका पूर्वडीआईजी रञ्जन कोइरालालाई कैद मिनाह गरेको थियाे । पूर्वडीआईजी ८ वर्ष ६ महिनामै छुटेपछि बाबुरामले उक्त प्रतिक्रिया दिनुभएकाे हाे ।
जिल्ला अदालत र उच्च अदातलले श्रीमती गीता ढकालको हत्या अभियोगमा रञ्जनलाई जन्मकैद सजाय सुनाएको थियो ।
उहाँले प्रधानमन्त्री केपी शर्मा ओलीलाई विदा गरेर नेकपाभित्रैबाट नयाँ प्रधानमन्त्री चयन गर्नुपर्ने सुझाव पनि दिनुभएकाे छ । त्यस्तै पूर्वप्रधानमन्त्री भट्टराईले भ्रष्टाचार रोक्न शक्तिशाली लोकपाल गठन गर्नुपर्ने र प्रत्यक्ष निर्वाचित कार्यकारी राष्ट्रपतिमा जानुपर्ने पनि सुझाव दिनुभएकाे छ ।
बाबुरामले ट्वीटरमा लेख्नुभएकाे छ, ‘देश गम्भीर संकटतिर जाँदैछ। लोकतान्त्रिक ढंगले संकटमोचन गर्न यसो गरौं :१.संसद अधिवेशन बोलाऊँ; २. केपी शर्मा ओलीलाई विदा गरेर नेकपाभित्रैबाट नयाँ प्रधानमन्त्री चयन गरौं; ३.अपराधका संरक्षक न्यायाधीशमाथि महाभियोग लगाऊँ; ४.भ्रष्टाचार रोक्न शक्तिशाली लोकपाल गठनगरौं; ५.प्रत्यक्ष निर्वाचित कार्यकारी राष्ट्रपतिमा जाऊँ!’
