कोरोना: राजनीतिक झगडाले ग्रस्त ब्राजिलमा संक्रमित १० लाख बढी, मृतक ५० हजार नजिक
प्रकाशित मिति : असार ५, २०७७ शुक्रबार
विश्वमा कोरोनाको महामारी सुरु भएको महिनौंपछि ल्याटिन अमेरिकाको सबैभन्दा ठूलो देश ब्राजिलमा कोरोना संक्रमण पुष्टी हुनेहरुको संख्या १० लाख नाघेको छ । शुक्रबारमात्र ब्राजिलमा ५४ हजार ७ सय ७१ मा संक्रमण पुष्टी भएको हो ।
अब ब्राजिलमा कोरोना संक्रमण पुष्टी हुनेहरुको संख्या १० लाख ३२ हजार ९ सय १३ पुगेको छ । मृतकको संख्या पनि ५० हजारको नजिक छ । शुक्रबारसम्म मृतकको संख्या ४८ हजार ९ सय ५४ पुगेको छ । एकैदिनमा १२०६ को मृत्यु भएको हो ।
विश्वमा अमेरिकापछि सबैभन्दा धेरै संक्रमण पुष्टी हुने र मृत्यु हुनेहरुको संख्या ब्राजिलमा छ । २१० मिलियन जनसंख्या रहेको ब्राजिल राजनीतिक झगडाले ग्रस्त भएका कारण र बेमेल क्यारेन्टीन आदेशहरुका कारण विज्ञहरुलाई कहिले कोरोना चरमउत्कर्षमा पुग्छ भन्ने निचोड निकाल्न मुस्किल बनाएको छ ।
रियो दि जेनेरियोको एउटा विश्वविद्यालयले जुनको अन्तिमसम्ममा १३ लाखमा संक्रमण पुष्टी हुने अनुमान गरेको छ । विश्वभर कोरोनाको महामारी फैलिंदा ब्राजिलले कुनै खास तयारी नगरेका कारण अहिले ब्राजिलमा महामारीले यो रुप लिएको विश्लेषण गरिएको छ ।
ब्राजिलमा फरबरीको अन्त्यमा पहिलोपटक कोरोना संक्रमण पुष्टी भएको थियो । युरोपको भ्रमणबाट फर्केका साओ पाउलोका ब्यापारीमा कोरोना संक्रमण देखिएको थियो । विगत तीनसातामा ब्राजिलले कोरोनाबाट भएको मृत्युमा स्पेन, इटली र बेलायतलाई उछिनेको छ ।