अमेरिकाभित्रै हुनेका ग्रिनकार्ड आवेदनपनि गुपचुप ‘होल्ड’मा
प्रकाशित मिति : जेष्ठ ३०, २०७७ शुक्रबार
अमेरिकी राष्ट्रपति डोनाल्ड ट्रम्पले अमेरिकाबाहिर आउनेहरुको आप्रवासी भिसामा रोक लगाउने आदेश जारी गरेपनि अमेरिकाभित्रै हुनेका ग्रिनकार्ड आवेदन समेत युएससीआईएसले होल्डमा राखेको छ । गत अप्रिलमा २२ मा अमेरिकी राष्ट्रपति ट्रम्पले ६० दिनका लागि आप्रवासी भिसा जारी गर्नमा रोक लगाएका थिए ।
युससीआईएसले यसै हप्ता कर्मचारीहरुलाई आन्तरिक निर्देशन जारी गर्दै ग्रिनकार्ड आवेदनहरु होल्डमा राखेर नागरिकता वितरण समारोहहरुलाई प्राथमिकता दिन भनेको थियो । तर कर्मचारीहरुलाई बुधबार पठाइएको अर्को इमेलमा निश्चित प्रकारका ग्रिनकार्ड आवेदनलाई भने प्रकृयामा लैजान भनिएको छ ।
स्वास्थ्य सेवा प्रदायकहरु र इमर्जेन्सी तथा संवेदनशिल अवस्थाका ग्रिनकार्ड आवेदनहरुलाई भने होल्डमा नराख्न भनिएको जनाइएको छ । युएससीआईएसले भने ग्रिनकार्ड आवेदनलाई प्रकृयामा लैजानका लागि राखिएको होल्डलाई कोरोनाको महामारीका कारण ग्रिनकार्डका अन्तरवार्ताहरु र बायोमेट्रिकहरु रोकिएका कारण उत्पन्न अवस्था बताएको छ ।
युएससीआईएसले अहिले आफ्नो प्राथमिकतामा कोरोनाको महामारीका कारण रोकिएका नागरिकता वितरण समारोहहरुलाई सुचारु गर्नु रहेको स्पष्ट पारेको छ । युएससीआईएसले वक्तब्यमार्फत आफूहरुले कोरोनाबिरुद्धको लडाई सम्बन्धित ग्रिनकार्डका आवेदनहरु र अत्यावश्यक स्टाटस एड्जस्टका अन्तरवार्ताहरुलाई प्राथमिकता दिएको तथा अरु व्यक्ति उपस्थीत हुनुपर्ने सेवाहरु निकट भविश्यमा सुचारु गर्ने जनाएको छ ।