जनता समाजवादी पार्टीको दर्ता नम्बर १३९२, डा.बाबुराम भट्टराई चौथो नम्बरमा
प्रकाशित मिति : जेष्ठ २५, २०७७ आईतबार
जनता समाजवादी पार्टी निर्वाचन आयोगमा दर्ता भएको छ । महन्थ ठाकुर र उपेन्द्र यादव केन्द्रीय कार्यसमिति अध्यक्ष भएका छन् । यस्तै, डा.बाबुराम भट्टराई, राजेन्द्र महतो र अशोक राई वरिष्ठ नेताका रुपमा रहेका छन् ।
ठाकुर र यादवको अध्यक्ष रहने गरी आइतबार समाजवादी पार्टी नेपाल र राष्ट्रिय जनता पार्टी नेपालबीच एकता भई बनेको जनता समाजवादी निर्वाचन आयोगमा दर्ता भएको हो । जनता समाजवादी पार्टीको दर्ता नम्बर १३९२ भएको छ।
डा. बाबुराम भट्टराईको नाममा राजपाका नेताहरुले आपत्ति जनाएपछि बाबुराम पछि हट्न बाध्य भएका छन् । भट्टराई, राजेन्द्र महतो र अशोक राई बरिष्ठ नेता रहेका छन् । श्रेष्ठका अनुसार जसपाको ७०१ सदस्यीय केन्द्रीय समिति र ५३ सदस्यीय केन्द्रीय कार्यकारीणी समिति रहने व्यवस्थ गरिए पनि आज केवल ५२ जनाको मात्र नाम निर्वाचन आयोगमा बुझाइएको छ ।
कुनै बेला शक्तिशाली पार्टी एमाओवादीको उपाध्यक्ष रहेका र प्रचण्डपछिको बरियतामा रहेका तथा प्रधानमन्त्री भइसकेका भट्टराई मधेश केन्द्रित पार्टीमा पुगेर चिसो पानीले नुहाउने अवस्थामा पुगेको राजनीति विश्लेषकहरुले बताएका छन् ।
आज भन्दा ४६ दिन अघि सरकारले राजनीतिक दल विभाजनसम्वन्धी अध्यादेश ल्याएका कारण रातारात पार्टी एकता गर्न पुगेका दुई मधेशवादी दलले आज निर्वाचन आयोगमा दल दर्ताको अन्तिम सूचना दिएका हुन् ।