कोरोनाबिरुद्धको चाइनिज भ्याक्सिन यहीबर्षको अन्त्यसम्ममा तयार हुने
प्रकाशित मिति : जेष्ठ १७, २०७७ शनिबार
चीनमा बनाइदै गरेको कोरोनाबिरुद्धको भ्याक्सिन यही बर्षको अन्त्यसम्ममा तयार हुने सम्भावना देखिएको छ । सरकारी स्वामित्वको सम्पत्ति निरिक्षण तथा प्रशासन आयोगको वीच्याटमा प्रकाशित रिपोर्टमा यसबारे उल्लेख गरिएको छ ।
यो भ्याक्सिन संयुक्त रुपमा बेइजिङ इन्स्टीच्युट अफ बायोलोजिकल प्रोडक्ट र चाइना नेशनल बायोटेक गु्रपले विकाश गरेका हुन् । रिपोर्टमा भ्याक्सिनको दोश्रो चरणको परीक्षण पूरा हुने र यो बर्षको अन्त्यसम्म वा अर्कोबर्षको सुरुतिर सर्वसाधारणको प्रयोगका लागि उपलब्ध हुने उल्लेख गरिएको छ ।
भ्याक्सिन उत्पादन क्षमता बार्षिक १ सय मिलियनदेखि १२० मिलियनसम्म हुने जनाइएको छ । अहिले विश्वभर कोरोनाभाइरसबिरुद्धका एकसयभन्दा बढी भ्याक्सिनहरुको विकाश भइरहेको छ तर केहीमात्र भ्याक्सिनको विकाश आशालाग्दो रहेको छ ।
चीनमा सबैभन्दा धेरै ५ वटा कम्पनीहरुले निर्माण गरेको भ्याक्सिन मानवमा परीक्षण गरिएको छ । चीनका राष्ट्रपतिले सफल भएको भ्याक्सिन विश्वभर बाड्ने प्रतिबद्धता जनाएका छन् ।
भ्याक्सिनको सफलता जाँच्न तेश्रो चरणको परीक्षण आवश्यक छ । पोलियो र हेपाटाइटिसबिरुद्धको जस्तै प्रकारको कोरोनाबिरुद्धको भ्याक्सिन निर्माण गर्न लागिएको हो ।