भिसा बुलेटिन : विभिन्न श्रेणीका ग्रिनकार्डबारे जान्नैपर्ने ४ कुरा, महामारीमा पनि आवेदन दिन पाइने
प्रकाशित मिति : जेष्ठ ८, २०७७ बिहीबार
अहिले विश्वभर कोरोनाको महामारी छ, जसका कारण अमेरिकी सरकारको युएससीआईएसले व्यक्ति उपस्थीत हुनुपर्ने अन्तरवार्ता र अप्वाइन्टमेन्टहरु स्थगित गरेको छ । अमेरिकी सरकारले अमेरिकाबाहिरबाट जुन २३ सम्मका लागि आप्रवासी भिसा जारी गर्नमा पनि रोक लगाएको छ । तर आप्रवासन सुविधाका लागि आवेदन दिन भने रोक लगाएको छैन । आवेदकले अनलाइन वा हुलाकमार्फत यस्ता आवेदनहरु अहिले पनि दिन सक्छन् ।
यसैबीच जुन महिनाका लागि अमेरिकी सरकारले भिसा बुलेटिन जारी गरिसकेको छ । यो भिसा बुलेटिनमा जुनमा कसकसले ग्रिनकार्ड फाइल गर्न पाउने भन्ने विषयमा विस्तारमा उल्लेख गरिएको छ । खासगरी परिवारमा आधारित, रोजगारमा आधारित र डिभी लोटरीमा आधारित ग्रिनकार्ड र भिसाका सन्दर्भमा कतिसम्म प्राथमिकता मिति वा केस नम्बर हुनेहरुलाई जुनमा ग्रिनकार्ड वा भिसा प्रकृया अगाडि बढाइने भन्नेबारे जानकारी दिइएको छ ।
ग्रिनकार्डबाहकका दम्पत्ति तथा २१ बर्ष नपुगेका छोराछोरीहरुलाई जुनमा पनि मौका
अमेरिकामा विवाह गर्ने र अमेरिकामा नै रहेका दम्पत्ति तथा २१ बर्ष उमेर नपुगेका छोराछोरीहरुलाई ग्रिनकार्ड आवेदन दिन चाहनेहरुका लागि जुन महिनामा पनि मौका आएको छ । जुन महिनामा दम्पत्ति र छोराछोरीहरुका लागि आई १३० आवेदन दिन चाहनेहरुले एकसाथ आई ४८५ आवेदन समेत दिनसक्ने भएका छन् । जुन सुविधा अमेरिकी नागरिकलाईमात्र रहदै आएको थियो ।
१ बर्षदेखि पाउँदै आएको यो सुविधा जुनमा पनि ग्रिनकार्डवाहकका लागि समेत जारी भएको छ ।
गत बर्षको जुलाईदेखि नै परिवारमा आधारित उक्त श्रेणीको ग्रिनकार्डका लागि आवेदन मिति सबैका लागि करेन्ट हुँदै आएको छ । अमेरिकामा नै विवाह गरेर आफ्ना दम्पत्तिका लागि ग्रिनकार्ड फाइल गर्न चाहने ग्रिनकार्डवाहकका लागि समेत यसलाई सुनौलो मौका भनिएको छ ।
आई १३० आवेदन युएससीआईएसमा पेन्डिङ अवस्थामा रहेकाहरुले पनि अमेरिकामा नै रहेका दम्पत्ति र छोराछोरीका लागि आई ४८५ ग्रिनकार्ड आवेदन दिएर वर्क परमिट र एड्भान्स परोल समेत प्राप्त गर्न सक्छन् । साथै उनीहरुलाई भिसा जोगाइराख्ने झन्झट हुँदैन ।
तर अमेरिकाबाहिर दम्पत्ति र छोराछोरी हुनेहरुका सन्दर्भमा भने आवेदकले कुनै आवेदन फाइल गर्न जरुरत छैन । आई १३० स्वीकृत भएर आवेदन नेशनल भिसा सेन्टरमा गइसकेकाहरुले भने दूतावासमा छिटो अन्तरवार्ता प्राप्त गर्नसक्नेछन् ।
डिभी विजेता नेपालीको १३ हजार ५ सय सम्म केसनम्बर करेन्ट
भिसा बुलेटिन अनुशार जुन र जुलाई महिनाका लागि नेपाली डिभी विजेताहरुको केस नम्बर १३ हजार ५ सयसम्म तोकिएको छ ।
तर मार्चको तेश्रो सातादेखि भने नेपाली डिभी विजेताहरुले अमेरिकाको भिसा प्राप्त गर्न सकेका छैनन् । मार्चको तेश्रो सातादेखि काठमाडौंमा रहेको अमेरिकी दूतावासले अधिकांश भिसा जारी गर्न रोकेको छ ।
त्यस्तै अमेरिकी राष्ट्रपति डोनाल्ड ट्रम्पले अप्रिलको अन्तिम सातादेखि जुनको अन्तिम सातासम्मका लागि आप्रवासी भिसा जारी गर्नमा रोक लगाएका छन् । जसका कारण विश्वका अन्य कुनै देशका नागरिकका लागि पनि आप्रवासी भिसा जारी हुन सकेको छैन । ट्रम्पको आप्रवासन रोकको अवधि थप हुने नहुनेबारे जुनको १० तारिखपछिमात्र टुंगा लाग्नेछ ।
भिसा बुलेटिन अनुशार जुन र जुलाईका लागि नेपाली र इजिप्टका लागिमात्र सिमाबन्दी तोकिएको हो । जुन महिनाका लागि इजिप्टका लागि ४२ हजारसम्म केस नम्बर हुनेहरुको र नेपालका लागि १३ हजार ५ सयसम्म केस नम्बर हुनेहरुको भिसा करेन्ट बनाइपनि जुलाईका लागि समेत सोही नम्बर नै कायम गरिएको छ ।
यसपटक नोभेम्बर ५ सम्म डिभी लोटरी भरिरहेकाहरुले आगामी जुन ६ मा नजिता प्राप्त गर्नेछन् । उनीहरुले आगामी अक्टोबर १ देखि भिसा पाउन सुरु गर्नेछन् । यसबर्षदेखि डिभी लोटरी भर्नका लागि पासपोर्ट अनिवार्य गरिएको थियो ।
नागरिकका भन्दा ग्रिनकार्डवाहकका छोराछोरीको ग्रिनकार्ड छिटो
भिसा बुलेटिन अनुशार अमेरिकी नागरिकका २१ बर्ष उमेर पुगेका अविवाहित छोराछोरीको तुलनामा ग्रिनकार्डवाहकका नागरिकका भन्दा ग्रिनकार्डवाहकका छोराछोरीको ग्रिनकार्ड छिटो हुने भएको छ ।
जुन महिनाका लागि अमेरिकी नागरिकका २१ बर्ष उमेर पुगेका अविवाहित छोरछोरीको ग्रिनकार्डको अन्तिम एक्सन मिति २२ मे २०१४ रहेको छ । अर्थात् त्यो मितिभन्दा अगाडि प्राथमिकता मिति भएकाहरुले जुन महिनामा ग्रिनकार्ड पाउनेछन् ।
तर ग्रिनकार्डवाहकका २१ बर्ष उमेर पुगेका अविवाहित छोरछोरीको ग्रिनकार्डको अन्तिम एक्सन मिति १५ मार्च २०१५ रहेको छ । अर्थात् त्यो मितिभन्दा अगाडि प्राथमिकता मिति भएकाहरुले मार्च महिनामा ग्रिनकार्ड पाउनेछन् । जुन नागरिकका छोराछोरीको तुलनामा झण्डै १० महिना छिटो रहेको छ ।
अमेरिकामा नै रहेका अमेरिकी नागरिकका २१ बर्ष पुगेका अविवाहित छोराछोरीहरुले जुनमा मा स्टाटस एडजस्ट गर्न चाहेको खण्डमा उनीहरुको प्राथमिकता मिति १५ फरबरी २०१५ भन्दा अगाडि हुनुपर्नेछ । उक्त मितिभन्दा अगाडि प्राथमिकता मिति भएका, अमेरिकामा नै रहेकाहरुले ग्रिनकार्डका लागि जुनमा आई ४८५ आवेदन दिनसक्नेछन् । तर आई ४८५ फाइल गर्ने मितिसम्म उनीहरुको अमेरिकामा गैरकानुनी उपस्थीति भएको हुनुहुँदैन ।
अमेरिकामा नै रहेका ग्रिनकार्डवाहकका नागरिकका २१ बर्ष पुगेका अविवाहित छोराछोरीहरुले जुनमा स्टाटस एड्जस्त गर्न चाहेको खण्डमा उनीहरुको प्राथमिकता मिति १ डिसेम्बर २०१५ भन्दा अगाडि हुनुपर्नेछ । उक्त मितिभन्दा अगाडि प्राथमिकता मिति भएका, अमेरिकामा नै रहेकाहरुले ग्रिनकार्डका लागि मार्चमा आई ४८५ आवेदन दिनसक्नेछन् । तर आई ४८५ फाइल गर्ने मितिसम्म उनीहरुको अमेरिकामा गैरकानुनी उपस्थीति भएको हुनुहुँदैन ।
यसरी हेर्दा अमेरिकामा रहेका अमेरिकी नागरिकका २१ बर्ष पुगेका अविवाहित छोराछोरीहरुको तुलनामा ग्रिनकार्डवाहकका २१ बर्ष पुगेका अविवाहित छोराछोरीहरुको आई ४८५ फाइल गर्ने मिति पनि झण्डै १० महिना छिटो रहेको छ ।
एक्स्ट्राअर्डिनरी लगायत रोजगारमा आधारित पहिलो श्रेणीको ग्रिनकार्ड जुनमा पनि करेन्ट
अमेरिकामा गत डिसेम्बरमा करेन्ट भएको रोजगारमा आधारित पहिलो श्रेणीको ग्रिनकार्डको आवेदन जनवरी, फरबरी, मार्च, अप्रिल र मे हुँदै जुनमा पनि करेन्ट भएको छ । अर्थात् एक्स्ट्राअर्डिनरी लगायत रोजगारमा आधारित पहिलो श्रेणीको ग्रिनकार्डका लागि आवेदन दिन चाहने व्यक्तिले जुनमा पनि आई १४० सँगै ग्रिनकार्ड आवेदन अर्थात् आई ४८५ समेत एकसाथ फाइल गर्न पाउनेछन् ।
रोजगारमा आधारित अन्य श्रेणीको ग्रिनकार्डको आवेदन मिति पनि जुनमा करेन्ट रहेको छ । तर तेश्रो श्रेणीको ग्रिनकार्ड भने करेन्ट छैन । तेश्रोबाहेक अरु सबै श्रेणीका ग्रिनकार्डमा नेपालीहरुले आई १४० सहित ग्रिनकार्ड आवेदन फाइल गर्न पाउनेछन् ।
एक्स्ट्राअर्डिनरी लगायत रोजगारमा आधारित पहिलो श्रेणीको ग्रिनकार्डका लागि आवेदन दिएका र आवेदन पेन्डिङ अवस्थामा रहेकाहरुले पनि जुनमा ग्रिनकार्ड आवेदन अर्थात् आई ४८५ फाइल गरेर वर्क परमिट लिएर काम गर्न वा एड्भान्स परोल लिएर यात्रा गर्न पाउनेछन् ।
पहिलो श्रेणीमा एक्स्ट्रा अर्डिनरी क्षमता भएकाहरु, अतिदक्ष प्रोफेसर र रिसर्चरहरु, बहु राष्ट्रिय म्यानजर र कार्यकारीहरु पर्छन् । त्यसमध्ये एक्स्ट्राअर्डिनरी क्षमताको ग्रिनकार्डका लागि आवेदक आफैले वा वकिलको सहायतामा आवेदन दिन पाउँछन् भने अरुका लागि रोजगारदाता कम्पनीले आवेदन दिनुपर्छ । एक्स्ट्रा अर्डिनरी ग्रिनकार्डका लागि रोजगारदाताको आवश्यकता हुँदैन ।