६ महिनामा अमेरिका आउन नसकेका ग्रिनकार्डवाहकले बोक्नसक्ने ५ प्रकारका प्रमाण
प्रकाशित मिति : बैशाख २७, २०७७ शनिबार
यदि तपाई ग्रिनकार्डवाहक हुनुहुन्छ र १८० दिनभित्र अमेरिका प्रवेश गर्न सक्नुभएको छैन भने अमेरिकी सरकारले तपाईले स्थायी बासिन्दाको स्टाटस त्यागेको अनुमान लगाउन सक्छ । तर अहिले कोरोनाको महामारीका कारण तपाई अमेरिका फर्कन नसकेको अवस्था पनि हुनसक्छ ।
यदि तपाई ग्रिनकार्डवाहक हुनुहुन्छ तर अमेरिकाबाहिर बसेको १८० दिन नाघिसकेको छ भने तपाईको अमेरिका प्रवेशमा प्रश्नवाचक चिन्ह लाग्नसक्छ । अर्थात् तपाईले अमेरिका छिर्ने क्रममा कस्टम एण्ड बोर्डर प्रोटक्सनका अधिकारीहरुबाट प्रश्नको सामना गर्नुपर्ने हुनसक्छ । यो अवस्थामा तपाईलाई अमेरिकामा प्रवेशमा रोक समेत लाग्नसक्छ ।
तर नआत्तिनुहोस् । तपाईले केही प्रमाणहरु तपाईसँग बोकेको खण्डमा भने तपाईलाई कुनै समस्या नहुनसक्छ । तपाईले कोरोनाको महामारीका कारण तपाई १८० दिनभित्र अमेरिका आउन नसकेको प्रमाणका अतिरिक्त अन्य केही प्रमाणहरु पनि तयार पार्न सक्नुहुनेछ , जसले तपाईले अमेरिकामा स्थायी बासिन्दाको स्टाटस परित्याग नगरेको कुरा विश्वस्त पार्नेछ ।
यदि तपाईको अमेरिकामा घर छ वा अपार्टमेन्ट भाडामा लिनुभएको छ भने तपाईले त्यसको प्रमाण आफूसँग बोक्नुहोला । यदि तपाई घरमालिक हो भने वा अपार्टमेन्ट भाडामा लिनुभएको छ भने यो तपाईका लागि स्थायी बासिन्दाको स्टाटस नत्यागेको प्रमाण बन्नसक्छ ।
तपाईले अमेरिकामा आफ्नो आर्थिक सम्बन्ध निरन्तर रहेको पुष्टी गर्न बैंक एकाउन्ट, क्रेडिट कार्ड वा कुनै लगानी अद्यावधिक रहेको प्रमाण तपाईसँग बोक्न सक्नुहुनेछ । त्यस्तै घर, स्वास्थ्यविमा वा जीवनबिमाको प्रमाणपनि तपाईको स्टाटसको निरन्तरताको प्रमाण हुनसक्छ ।
त्यस्तै तपाईले अमेरिकाको आफ्नो ठेगानामा ट्याक्स फाइल गर्न सक्नुहुनेछ । यदि तपाईले अमेरिकाको ठेगानामा ट्याक्स फाइल गर्नुभएको छ भने उक्त प्रमाणका आधारमा तपाईलाई अमेरिका प्रवेशमा समस्या नहुनसक्छ । आईआरएसले ट्याक्स फाइलको म्याद जुलाई १५ सम्म लम्बाएको छ । तपाईले अमेरिकाबाहिरैबाट पनि ट्याक्स फाइल गर्न सक्नुहुनेछ । यदि तपाईले सन् २०१९ को ट्याक्स फाइल गर्नुभएको छैन भने तुरुन्त गर्नुहोला ।
यदि तपाईको अमेरिकामा गाडी छ भने र तपाईको उक्त गाडीको मालिक हो भने त्यसको प्रमाण अद्यावधिक ड्राइभर लाइसेन्स सहित राख्नुहोला । त्यस्तै यदि तपाईको नाममा घरको विद्युत, पानी वा इन्टरनेटको बिल छ भने पनि यो तपाईको आवासीय निरन्तरताको प्रमाण हुनसक्छ ।
यी मध्ये तपाईसँग उपलब्ध प्रमाणसहित एयरपोर्ट वा सिमामा आउने बेलामा सीबीपीबाट प्रश्नको सामना गर्न तयार हुनुहोला । तपाईले समयमै अमेरिका आउन नसक्नुको उचित कारण दिनसक्नुपर्नेछ ।
(यी सुझावहरु कानुन व्यवसायी फुलवानी नाचम्यानले दिएका हुन् । कुनै कानुनी विषयमा सल्लाह गर्नुपरेमा लाइसेन्सप्राप्त कानुन व्यवसायीलाई सम्पर्क गर्नुहोला ।)