अप्रिल १५ मा करदाखिला म्याद तय गरेकालाई जुलाई १५ बनाउने अवधि केही घण्टामात्र
अप्रिल १५ मा ट्याक्स तिर्नेम्याद राखेकाहरुलाई ट्याक्स तिर्ने म्याद परिवर्तन गरेर जुलाई १५ सम्म बनाउने अवधि केही घण्टामात्र बाँकी रहेको छ । अप्रिल १५ मा ट्याक्स तिर्ने मिति तय गरेकाहरुले सोमबार मध्यरातसम्म त्यसलाई परिवर्तन गरेर जुलाई १५ सम्म बनाउन सक्नेछन् ।
अधिकांश करदाताहरुले विद्युतीय रुपमा आफ्नो खाताबाट कररकम बुझाउने अवधि अप्रिल १५ मा तय गरेका थिए । तर कोरोना भाइरसको महामारीका कारण आईआरएसले यो अवधि बढाएर जुलाई १५ सम्म बनाउन मिल्ने गराएको छ ।
यदि अप्रिल १५ मा कर रकम बुझाउने मिति तय गरेकाहरुले सोमबार मध्यरात अगाडि उक्त मिति परिवर्तन नगरे आईआरएसले उनीहरुको खाताबाट रकम लैजाने प्रयास गर्नेछ । त्यसैले म्याद सार्न चाहनेहरुले अहिले नै कदम चाल्न आईआरएसले सचेत गराएको छ ।
आईआरएसले कोरोनाको महामारीका कारण व्यक्तिगत कर फाइल गर्ने म्याद पनि बढाएर जुलाई १५ सम्म तय गरिसकेको छ । त्यसैले पहिले नै ट्याक्स फाइल गरिसकेकाहरुले पनि आईआरएसलाई कर तिर्ने म्याद पछाडि सारेर जुलाई १५ सम्म बनाउन सक्नेछन् ।
बैंकबाट कर रकम दाखिला गर्ने म्याद पछाडि सार्नका लागि दुईवटा विकल्पहरु बनाइएको छ । विद्युतीय फेडरल ट्याक्स पेमेन्ट प्रणालीको प्रयोग गरेर कर दाखिलाको म्याद पछाडि सार्न सकिनेछ । जुन निशुल्क रहेको छ ।
त्यस्तै डेबिट क्रेडिट कार्ड वा डिजिटल वालेटको प्रयोग गरेर पनि कर दाखिलाको म्याद पछाडि सार्न सकिन्छ । पहिले नै रकम दाखिला गर्ने म्याद राखिएको र अहिले रद्द गर्नुपरेमा यसबारे थप जानकारीका लागि आईआरएसको यो लिंकमा पनि हेर्न सकिनेछ । तपाईले यो लिंकमार्फत अप्रिल १५ मा दाखिला गर्न तय भएको रकम रद्द गर्न सक्नुहुनेछ ।
जुलाई १५ मा रकम तिर्नका लागि जुन १५ पछि मिति तय गर्न सकिनेछ ।
