देउवाबाट न्युयोर्कमा ज्यान गुमाएका नेपालीप्रति श्रद्धाञ्जली, नेपाली समुदाय र परिवारमा समवेदना
प्रकाशित मिति : चैत्र २३, २०७६ आईतबार
नेपाली कांग्रेसका सभापति एवं पूर्व प्रधानमन्त्री शेरबहादुर देउवाले न्युयोर्कमा नेपालीहरुको असामयिक निधन भएकोमा दिवंगतहरुको आत्माको चीर शान्तिको कामना गर्दै शोकाकुल परिवारहरुमा समवेदना व्यक्त गर्नुभएको छ । नेपाली काँग्रेसका आमन्त्रित केन्द्रीय सदस्य तथा नेपाली जनसम्पर्क समिति अमेरिकाका सभापति आनन्द बिष्टमार्फत उहाँले समवेदना पठाउनुभएको हो ।
बिष्टले भन्नुभयो – ‘आज बिहान मलाई फोन गरेर सभापति देउवाले एकै दिन यसरी नेपाली दाजुभाईको निधनको खबरले आफु स्तब्ध भएको भन्दै दिवंगत व्यक्तिहरुप्रति श्रद्धान्जली अर्पण गनुएभएको छ । सभापति देउवाले शोक सन्तप्त परिवारजन र सम्पूर्ण नेपाली समुदायप्रति समवेदना समेत व्यक्त गर्नु भएको छ ।’
देउवाले जनसम्पर्क समिति अमेरिका मार्फत यस शोक र दुखको घडीमा सबैलाई धैर्य गर्न आग्रह गर्नुभएको छ । देउवाले बिष्टमार्फत भन्नुभएको छ – ‘विश्वभर फैलिएको महामारीबाट बँच्न,आफु र आफ्नो परिवार सुरक्षित राख्न आवश्यक पूर्व सतर्कता र सचेतता अपनाउदै यो बेला घरभित्रै बस्नुको विकल्प छैन । यस्तो अवस्थामा पनि त्यहाँ नेपालीहरुले एक अर्कालाई सहयोग गर्न मानवीय रुपमा जसरी काम गरिरहनु भएको छ,ती सबै दाजुभाई तथा दिदीबहिनीप्रति म उच्च सम्मान व्यक्त गर्दछु ।’
‘तर मेरो आग्रह छ,यो बेला सबैभन्दा पहिले आफू सतर्क र सुरक्षित हुनुपर्छ । म जनसम्पर्क समिति मार्फत अमेरिकाका सम्पूर्ण नेपालीहरुलाई यो विकराल महामारीका बेला उच्च मनोबल कायम गर्दै आवश्यक सतर्कता अपनाएर सुरक्षित रहन अनुरोध गर्दछु’ – सभापति देउवाले आफ्नो संदेश सबै नेपालीहरुमाझ पुराउन आग्रह गर्दै भन्नुभयो ।
पार्टी सभापति देउवाले अमेरिकामा रहेका नेपालीहरुको अहिलेको स्थितिप्रति देखाउनु भएको गम्भीर चासो,चिन्ता र सदभावका लागि बिष्टले सबै नेपाली समुदायको तर्फबाट आभार व्यक्त गर्नुभएको छ । बिष्टले भन्नुभएको छ – ‘संकट र महामारीको यो बेला हामी सबै उच्च मनोबलका साथ परिस्थितिको सामना गर्न सक्षम हुनुपर्छ । आत्मबल बलियो बनाउदैं तपाईं,हामी सुरक्षित रहुन घरभित्रै बसौं ।’