कोरोनाको महामारीका कारण फर्कने नसकेकालाई भिसा थपमा विशेष विचार र तीब्र प्रकृया


प्रकाशित मिति : चैत्र २०, २०७६ बिहीबार

अमेरिकामा भिजिटिर लगायतका विभिन्न भिसामा आएर कोरोनाको महामारीका कारण समयमै फर्कन नसकेकालाई युएससीआईएसले भिसा थपमा विशेष विचार र तीब्र प्रकृया अपनाउन सक्ने जनाएको छ । युएससीआईएसकी प्रवक्ता शारोन ई साइडहावरले खसोखासलाई जानकारी दिदै भनिन् – ‘हामी केसका आधारमा आवश्यक पर्ने व्यक्तिका लागि विशेष विचार र शीघ्र प्रकृया अपनाउनेछौं ।’

भिसावाहकहरु नियन्त्रणबाहिरको अवस्थाबाट प्रभावित हुँदा युएससीआईएसले अनुरोधकलाई विशेष सहयोग प्रदान गर्नसक्ने उनले बताएकी छिन् । अमेरिकामा गैरआप्रवासी बसाई लम्बाउन चाहनेहरुलाई उनीहरुको परिस्थीतिका आधारमा युएससीआईएसले बसाईको अवधि थप गर्ने उनको भनाई छ ।

अमेरिकामा भिसा सकिएपछि पनि कोरोना भाइरसको महामारीका कारण भिसा थप्नका लागि तत्काल आवेदन दिन सक्ने अवस्था नभएको खण्डमा समेत युएससीआईएसले आवेदनका लागि भएको ढिलाईलाई समेत माफी दिने जनाएको छ । भिजिटर लगायतको भिसा थप्नका लागि अनलाइनमार्फत नै आवेदन दिनसकिन्छ । यदि भिसा थपको शुल्क तिर्न नसक्ने अवस्था भएमा भिसा शुल्क मिनाहाका लागि थप फर्म भर्नुपर्नेछ ।

आवेदनबारे शीघ्र फैसला चाहनेले अनलाइनमार्फत आवेदन भरिसकेपछि प्राप्त रिसिप्ट नम्बर लिएर युएससीआईएसमा सम्पर्क गर्नुपर्नेछ । युएससीआईएसको फोन नम्बर ८०० ३७५ ५२८३ मा सम्पर्क गरेर तपाईले कोरोनाको महामारीका कारण आफू फर्कन नसक्ने अवस्था आएको र स्वदेशमा फर्कनका लागि उडानहरु नरहेकोबारे युएससीआईएसलाई जानकारी दिनुपर्नेछ । त्यसपछि तपाईको आवेदनबारे युएससीआईएसले शीघ्र निर्णय दिनेछ ।

कोरोनाको महामारीका कारण कागजी फाइल गर्न झन्झट हुने भएकाले अनलाइनमार्फत आवेदन दिन प्रोत्साहन गरिएको छ ।

भिजिटर भिसा थपका लागि फाइल गर्न यहाँ क्लिक गर्नुहोला ।

तर भिसा सकिएर वा पढाई सकिएर फर्कन लागेका विद्यार्थीहरुका सन्दर्भमा भने इमिग्रेशन एण्ड कस्टम इन्फोर्समेन्ट आइसको स्टुडेन्ट एण्ड एक्सचेन्ज भिजिटर प्रोग्राम अन्तरगत काम हुने भएकाले युएससीआईएसले यसबारे नहेर्ने जनाएको छ । यसबारेमा खसोखासले आइसका प्रवक्तासँग कुराकानी गरिरहेको छ । थप जानकारी प्राप्त हुनासाथ अपडेट गराइनेछ ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com