पूरै क्यालिफोर्नियामा घरभित्र बस्न आदेश, के गर्न मिल्छ ? के गर्न मिल्दैन ?
गभर्नर गेभिन न्युसमले क्यालिफोर्निया राज्यका ४० मिलियन बासिन्दालाई घरबाहिर ननिस्कन आदेश दिएका छन् । यो आदेश गएरातीदेखि कार्यान्वयनमा आएको छ ।
क्यालिफोर्निया वासिंटन र न्युयोर्कपछि सबैभन्दा धेरै प्रभावित राज्य हो । क्यालिफोर्नियामा १०४७ मा कोरोना संक्रमण पुष्टी भएको छ ।
क्यालिफोर्नियाका गभर्नरले अमेरिकी राष्ट्रपति डोनाल्ड ट्रम्पलाई क्यालिफोर्निया राज्यका बासिन्दालाई कोरोना भाइरसबाट पर्ने प्रभावबारे जानकारी दिएका थिए । उनले आगामी ८ साताभित्र राज्यको ५६ प्रतिशत जनसंख्या कोरोना भाइरसबाट संक्रमित हुने अनुमान पत्रमा उल्लेख गरेका थिए ।
उनले राज्यभर ८ हप्तामा साढे २५ मिलियनमा संक्रमण हुने अनुमान गरेका हुन् । उनले क्यालिफोर्नियाको लस एन्जलसमा पानी जहाजको अस्पताल पठाउन राष्ट्रपति समक्ष अनुरोध गरेका छन् । रक्षा मन्त्रालयका अधिकारीहरुले एकसाताभित्र पानीजहाजको अस्पताल शियाटलमा पठाउने बताएका छन् ।
के गर्न मिल्छ ? के गर्न मिल्दैन ?
अब त्यसक्षेत्रमा घरमा साथीहरुलाई बोलाएर डिनर पार्टी गर्न पाइनेछैन । त्यस्तै शैलुन वा बार्बरकोमा गएर कापाल काट्न, मेनिकेयर गर्न पाइनेछैन । धार्मिक स्थलमा जम्मा हुन पाइने छैन, यस्ता धार्मिक कार्यहरु घरमै, फोन वा भिडियोबाट गर्नुपर्नेछ ।
भ्याकेसनमा अरु क्षेत्रमा जान पाइने छैन । यदि घर छाडेर भ्याकेसनमा बाहिर गएको खण्डमा तोकिएको अवधिसम्म घरमा आउन दिइनेछैन । जिम र हेल्थक्लबहरु बन्द गरिएको छ । त्यहाँ जान अनुमति छैन ।
त्यस्तै भित्र वा बाहिर रहेका स्वीमिङ पुलहरुमा पौडन अनुमति छैन । तर निजी पुल वा बाथ टब, हटटबमा भने नुहाउन कुनै रोक लगाइएको छैन ।
आफ्ना बालबच्चाहरुलाई न्यानीसँग छाड्न अनुमति छैन । तर न्यानी घरमै बस्ने भएको खण्डमा वा बच्चालाई स्वास्थ्य सेवा आवश्यक भएको खण्डमा भने छाड्न सकिनेछ । त्यस्तै बाबुआमाले घरबाहिरबाट स्वास्थ्य लगायतका क्षेत्रमा काम गर्नुपर्ने अवस्था भएमा पनि उनीहरुलाई बच्चालाई न्यानीसँग छाड्न सक्नेछन् ।
रेष्टुरेण्टहरु बन्द गरिएकाले त्यहाँ गएर खान अनुमति छैन । तर टेकआउट वा डेलिभरी भने गर्न सकिनेछ ।
पार्कमा जान, कुकुर डुलाउन अनुमति छ तर तपाई हरेक व्यक्ति ६ फिटको दुरीमा हुनुपर्छ । बैंकमा गएर पैसा निकाल्न अनुमति छ तर अनावश्यक यात्रा नगर्न सुझाव दिइएको छ ।
एक्लै खेल्ने खेलहरु खेल्न अनुमति छ । तर समुहमा खेल्ने खेलहरुका लागि अनुमति छैन । ग्रोसरी स्टोर, पसल ग्यास स्टेशन, बैंक लगायतका स्थानमा जान अनुमति छ ।
हुलाकहरु पनि खुल्ला रहेछन् । चिठीपत्रको काम गर्न अनुमति छ ।
ट्याक्सी, उबर लगायतका साधन प्रयोग गर्न अनुमति छ । तर अत्यावश्यक कामका लागिमात्र प्रयोग गर्न अनुमति छ । सामान किन्न जान वा अत्वाश्यक काममा यसको प्रयोग गर्न सकिन्छ । तर साथीको घरमा जान, पार्टीमा जान, पार्कमा जान भने यसको प्रयोग गर्न अनुमति छैन ।
यदि कसैले आदेशको उल्लंघन गरेमा कैद सजाय वा जरिवनाको समेत व्यवस्था रहेको छ । किनभने आदेश कानुनी रुपमा नै कार्यान्वयन गर्नका लागि दिइएको छ ।
