‘बर्षमा एकदिन आउने शिवरात्री मनाउँदा बदनाम गर्न खोजियो’ : शरिनप्रताप मल्ल
प्रकाशित मिति : फाल्गुन २३, २०७६ शुक्रबार
शरिनप्रताप मल्लले आफूले सामाजिक सञ्जालमा हालेको तस्वीरबारे प्रतिकृया दिदै शिवरात्रीको दिन भएकाले आफूहरुले यस्तो जमघट गरेको बताएका छन् । नेपालका प्रतिष्ठित व्यक्तिका परिवारका सन्तानहरुले सामाजिक सञ्जालमै हालेको गाँजा तानेको तस्वीरले एउटा बृत्तमा चर्चा कमाएको थियो ।
आफूहरुले अड्काका रुपमा त्यहाँ पुगेर दैनिक गाँजा सेवन गर्ने नगरेको समेत उनले बताएका छन् । शरिनप्रताप मल्ल पूर्वमन्त्री कृष्णप्रताप मल्लका छोरा हुन् । उनले आफ्नो फेसबुकमा हालेको तस्वीरमा राजा वीरेन्द्रका एक मात्र जीवित बहिनी शोभा शाहीको छोरा हिमांशु शाही समेत रहेका थिए, जो राइजिङ मलका सञ्चालक हुन् ।
आफूहरु हिन्दु भएका कारण बर्षमा एकदिन आउने शिवरात्री पर्व परम्परागत रुपमा मनाएको शरिनप्रताप मल्लले बताएका छन् । तस्वीरमा रहेका प्रवञ्जन सिंह योगी हुनुभन्दा अगाडि र अहिलेपनि आफ्नो साथी रहेको मल्लले बताएका छन् । साथै भगवान पशुपतिनाथको नजिक रहनका लागि भौतिक सुखसुविधाको जीवन त्यागेर मल्ल मृगस्थलीमा बस्दै आएको समेत उनको भनाई छ ।
‘पशुपतिनाथको दर्शन अगाडि हामी बाबा प्रवञ्जनलाई भेट्न गएका थियौं । त्यसपछि हामीले शाकाहारी रेष्टुरेण्टमा गएर खाना खाएर घर फर्केका हौं ।’ – शरिनप्रताप मल्लले भने । उनले बाहिर भनिएजस्तो रेष्टुरेण्टमा कुनै लफडा नभएको दावी गरेका छन् ।
शिवारात्रीको दिनमा खिचिएको भनिएको तस्वीरमा शारदा शाह र कुमार खड्गविक्रम शाहका छोरा दिवस विक्रम शाह पनि रहेका छन् । नेपाल वायुसेवा निगमका सम्मानित पाइलट आरपी राणाका छोरा लोकेश राणा पनि शरिनले पोष्ट गरेको फोटोमा देखिन्छन् । उनी बैंकर हुन् ।
त्यस्तै, नेपाली नागरिकता पाएर नेपालमै बसेका व्यापारीका छोरा ताकासी वकाबारा, नेपालका प्रथम वन विभागका प्रमुख कञ्जरभेटर तथा सिन्धुलीका प्रख्यात समाजसेवी मोहनविक्रम थापाका छोरा उदयविक्रम थापा, गुरुका भेषमा बसेका प्रवञ्जन सिंह पनि सोही तस्वीरमा छन् ।
थापा नेपाली सेनाका अवकास प्राप्त क्याप्टेन हुन् । सिंह भूपू आइजीपी हेमबहादुर सिंहका छोरा हुन् । पञ्चायतका जल्दाबल्दा मन्त्री शुशिला थापाका नाती विकाश थापा पनि सोही समूहमा छन् । उनी एक बैंकको उच्च पदमा कार्यरत छन् ।
त्यस्तै, धिरेन्द्र र ज्ञानेन्द्रका ज्वाईँ आदर्श राणा पनि सो समूहमा देखिएका छन् । उनी कुण्डलिनी हेल्थकेयर र कुण्डलिनी पार्टी प्यालेसका सञ्चालक हुन् ।
त्यसैगरी, मुमा बडामहारानी रत्नको बहिनीको नाती, युवराज दीपेन्द्रका प्रेमिका सुप्रियाका दाइ सुनिल शाह पनि तस्वीरमा देखिएका छन् । उनी हाल उनी एक इन्सोरेन्स कम्पनीमा काम गर्छन् ।
यो समाचार शरिनप्रताप मल्लको भनाईसहित अपडेट गरिएको छ । यसअगाडि यो समाचार ‘भीआईपीपुत्रहरुको गाँजाअड्डा’ शीर्षकमा प्रकाशित भएको थियो ।