बेलायत : अर्कोबर्षदेखि लागुहुने प्वाइन्टमा आधारित अध्यागमनबारे सरकारी रुपरेखा सार्वजनिक
प्रकाशित मिति : फाल्गुन ७, २०७६ बुधबार
बेलायतले अर्कोबर्षदेखि लागुहुने प्वाइन्टमा आधारित नयाँ अध्यागमन प्रणालीको रुपरेखा सहित सरकारी कागजात सार्वजनिक गरेको छ । बेलायतमा यो नयाँ अध्यागमन प्रणाली सन् २०२१ को सुरुदेखि लागु हुने अपेक्षा गरिएको छ ।
खासगरी रोजगारका लागि बेलायतमा आउनेहरुका लागि प्वाइन्टमा आधारित प्रणाली लागु गर्न लागिएको हो । श्रमबजारमा जागिरको अफर गर्नका लागि अब रोजगारदाताले पत्रिकामार्फत विज्ञापन गर्नुनपर्ने भएको छ ।
विदेशी कामदारहरुले स्पोन्सर लाइसेन्स भएको कम्पनीबाट सुनिश्चित जागिरको अफर प्राप्त गर्नुपर्नेछ भने स्पोन्सर लाइसेन्स नभएका कम्पनीहरुलाई लाइसेन्सका लागि आवेदन दिन सुझाव दिइएको छ ।
अफर गरिएको काम सरकारी मापदण्डभित्र परेको हुनुपर्छ । अहिलेको मापदण्ड अनुशार रेगुलेटेड क्वालिफिकेशन फ्रेमवर्कको लेभल ६ भित्र पर्नुपर्ने प्रावधान रहेपनि नयाँ मापदण्ड अनुशार लेभल ३ भित्र पर्नुपर्नेछ ।
रोजगारका लागि न्यूनतम दक्षता, तलब र सिपको मापदण्ड तय गरिएको छ । युरोपियन युनियनबाट बेलायत बाहिर गइसकेपछि अहिले कार्यान्वयनको चरणमा रहेको छ । कार्यान्वयनको अवधि सन् २०२० भित्र समाप्त हुनेछ । लगत्तै सन् २०२१ को जनवरीमा प्वाइन्टमा आधारित अध्यागमन प्रणाली लागु हुनेछ ।