ब्लुमबर्गको योजना : अध्ययन सकेकालाई ग्रिनकार्ड, टीपीएसवाहकलाई नागरिकताको बाटोमा
प्रकाशित मिति : माघ २७, २०७६ सोमबार
अमेरिकी राष्ट्रपतिका लागि डेमोक्रेटिक प्राइमरीका उम्मेदवार माइकल ब्लुमबर्गले राष्ट्रपतिमा निर्वाचित भएमा आफूले गर्ने अध्यागमन सुधारको योजना सार्वजनिक गरेका छन् । आफू अमेरिकाको राष्ट्रपतिमा निर्वाचित भएमा अमेरिकामा रहको एक करोड भन्दा धेरै कागजपत्रविहिनलाई अमेरिकी नागरिकताको बाटोमा लैजाने योजना उनले सार्वजनिक गरेका छन् ।
उनले वर्तमान राष्ट्रपति डोनाल्ड ट्रम्पले अध्यागमनमा कडाई गर्नका लागि ल्याएका नीतिहरु उल्टाउने र भिसा प्रणालीमा परिवर्तन गर्ने योजना सार्वजनिक गरेका छन् । अमेरिकाको विभिन्न क्षेत्रको आर्थिक र सामाजिक आवश्यकता पूर्तिगर्ने क्षेत्रमा आधारित भिसाको व्यवस्थ गर्ने उनले घोषणा गरेका छन् ।
त्यस्तै उनले विभिन्न देशमाथि लगाएको यात्रा प्रतिबन्ध हटाउने, छुटाइएका परिवारलाई मिलाउने र पर्खाल निर्माणको काम रोक्ने जनाएका छन् । त्यस्तै टीपीएस र डाकामा रहेकाहरुलाई विशेष कार्यक्रम घोषणा गरेर ग्रिनकार्डहुँदै नागरिकताको बाटोमा लैजाने योजना उनले सार्वजनिक गरेका छन् ।
स्टार्टअप भिसाको व्यवस्थागर्ने तथा विज्ञान, प्रविधि, इन्जिनियरिंग, गणित लगायत स्वास्थ्य र विजनेशनमा अमेरिकामा डिग्री गरेका विदेशी विद्यार्थीहरुलाई पनि ग्रिनकार्ड आवेदन दिन पाउने व्यवस्था गर्ने ब्लुमबर्गका योजना रहेको छ । विदेशी डाक्टर र नर्सका लागि समेत ग्रिनकार्डका लागि सहज वातावरण बनाउने ब्लुमबर्गको योजना छ ।
ब्लुमबर्गले १२ बर्षसम्म न्युयोर्क सिटीको मेयर हुँदा विविधता भएको समुदायलाई सेवा गरेको अनुभवका आधारमा अध्यागमन योजना अगाडि बढाउने बताएका छन् । अपराध गरेकाहरुलाईमात्र देशनिकाला गर्ने तर समुदायका सदस्यहरुलाई देशनिकाला नगर्ने ब्लुमबर्गको अध्यागमन योजनामा रहेको छ ।