एमाले निकट प्रवासी नेपाली मञ्च अमेरिकाको नेतृत्वमा होडबाजी
प्रकाशित मिति : चैत्र ७, २०७३ सोमबार
एमाले निकट प्रवासी नेपाली मञ्च अमेरिकाको नयाँ नेतृत्व छनौटका लागि मार्च ३१ देखि अप्रिल २ सम्म बाल्टिमोरमा हुने अधिवेशनको पूर्व सन्ध्यामा आगामी नेतृत्वबारे रस्साकस्सी सुरु भएको छ । नयाँ नेतृत्वका लागि अध्यक्षका दावेदारहरुमा टेक गुरुङ, प्रभु थापा र जनक राना रहेका छन् भने महासचिवका दावेदारहरुमा राधाकृष्ण देउजा र कमल ओझा अग्रपंक्तिमा रहेका छन् ।
अमेरिकाका चारवटा क्षेत्रबाट चार उपाध्यक्ष र चारवटा सचिवको छनौट हुने भएपनि उपाध्यक्षका दावेदारहरुमा १० जना रहेका छन् भने सचिवका लागि २४ जनाभन्दा धेरै छन् । आकांक्षीको संख्या हेर्दा चुनाव हुनेजस्तो देखिएपनि अन्तत सहमति हुने सम्भावना नटरेको उम्मेदवारहरुको भनाई छ । वर्तमान अध्यक्ष संजय थापा सहमतिको पक्षमा रहेकाले र आफू दोहोरिने मनस्थीतिमा नरहेकाले सहमतिको समेत सम्भावना जिवितै रहेको हो ।
अध्यक्षका दावेदार टेक गुरुङ लामो समयदेखि अमेरिकामा कृयाशिल मृदुभाषी समाजसेवी हुन् भने अर्का दावेदार प्रभु थापा संगठनका वर्तमान महासचिव हुन् । त्यस्तै टेक्सास निवासी जनक राना स्थानीय स्तरमा कृयाशिल छन् । महासचिवका दावेदार राधाकृष्ण देउजा प्रवासी नेपाली मञ्च अमेरिकाको न्युयोर्क अध्यक्ष हुन् भने नेपालको राजनीतिमा अमेरिकाबाट चर्चित र प्रभावशाली व्यक्तित्व हुन् । महासचिवका अर्का उम्मेदवार कमल ओझा प्रवासी नेपाली मञ्च अमेरिकाका वर्तमान सचिव हुन् ।
ओझा वर्तमान कार्यसमितिमा सचिव रहेकाले महासचिवको उम्मेदवारकामा रुपमा स्वभाविक दावेदारका रुपमा प्रस्तुत गर्दै आएको देखिएको छ । तर अर्का दावेदार देउजा भन्छन् – “संगठनमा समय र आवश्यकता अनुशारको जिम्मेवारी सम्हाल्ने एउटा कुरा हो । तर कुनै पदमा जानका निम्ति त्यो पदमा काम गर्न योग्यता र क्षमताले अब्बल रहेको आधारमामात्र दावी गर्ने आफ्नो स्वभाव अनुशार आफूलाई महासचिव पदमा अगाडि सारेको छु ।”
“अहिले जस्तोसुकै ढंगले दावी प्रस्तुत गर्ने र आआफ्नो प्रचार प्रसार गर्ने काम भएको भएपनि अन्तत सहमतिबाटै नयाँ नेतृत्व छनौट हुन्छ र त्यसो हुँदा को कहाँ रहन्छ भन्ने कुराले खास महत्व राख्दैन ।”- महासचिवका दावेदार देउजा भन्छन् ।