नेपाली रक्तदाताको सम्मानमा अमेरिकी टाउनले घोषणा गर्यो ‘विश्व रक्तदाता अर्जुन मैनाली दिवस’


प्रकाशित मिति : मंसिर २३, २०७६ सोमबार

१७२ पटक रक्तदान गरिसकेका नेपाली रक्तदाता अर्जुन मैनालीको सम्मानमा अमेरिकी टाउनले विश्व रक्तदाता अर्जुन मैनाली दिवस घोषणा गरेको छ । न्युयोर्कको ओएस्टर बे टाउनले सन् २०१९ डिसेम्बर २२ लाई अर्जुन मैनाली दिवस घोषणा गरेको हो ।

सन् १८१८ को डिसेम्बर २२ मा पहिलोपटक मानवमा रक्त प्रत्यारोपण गरिएको इतिहास रहेको छ । त्यही इतिहासलाई मध्यनजर गरेर आगामी डिसेम्बर २२ लाई विश्व रक्तदाता अर्जुन मैनाली दिवस घोषणा गरिएको टाउन अफ ओएस्टर बेले जनाएको छ ।

ओएस्टर बे न्युयोर्कको नासु काउन्टीको तीनवटामध्ये एउटा टाउन हो । यो टाउन न्युयोर्कको महानगरीय क्षेत्रभित्रै पर्छ, जहाँको जनसंख्या झण्डै ४ लाख रहेको छ । ओएस्टर बे टाउनका तर्फबाट मैनालीलाई एक घोषणासमेत हस्तान्तरण गरिएको छ ।

न्युयोर्कको हिक्सभिलमा बस्दै आएका मैनालीले ३२ बर्षको अवधिमा १७२ पटक रक्तदान गरिसकेका छन् । उनले पहिलोपटक सन् १९८७ को अगस्त २० मा पहिलोपटक रक्तदान गरेका थिए । त्यो यता विभिन्न ६ महादेशका १७ देश र अमेरिकामा १४ राज्यमा पुगेर रक्तदान गरिसकेका छन् ।

अमेरिकामा सन् २००८ देखि नै मैनालीले नेपाली र अन्य समुदायलाई रक्तदानका लागि प्रोत्साहन गर्दै आएका छन् । न्युयोर्कको समुदायमामात्र हरेक दिन २ हजार रक्तदान आवश्यक भएको सन्दर्भमा मैनालीको सत्कर्मको सम्मानमा अर्जुन मैनाली दिवस घोषणा गरिएको हो ।

टाउन अफ ओएस्टर बेका तर्फबाट आज विशेष समारोहकाबीच उक्त घोषणा मैनालीलाई हस्तान्तरण गरिएको छ । उक्त टाउनका सुपरभाइजर जोसेफ सालाडिनोले उक्त घोषण मैनालीलाई हस्तान्तरण गरेका हुन् जसमा सुपरभाइजरका साथमा ६ जना काउन्सिलम्यान र काउन्सिलवुमनहरुले हस्ताक्षर गरेका छन् ।

© 2023 KHASOKHAS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com