चलचित्र ‘छ माया छपक्कै’, न्यूयोर्कका दर्शकको माया लपक्कै
प्रकाशित मिति : मंसिर १६, २०७६ सोमबार
नेपाली कथानक चलचित्र ‘छ माया छपक्कै’ले न्यूयोर्कमा दुई शो भव्य प्रर्दशन गरेको छ । दर्शकले अत्याधिक रुचाएको यस बर्षकै उत्कृष्ट चलचित्र ‘छ माया छपक्कै’को न्यूयोर्कमा, पहिलो शो म्यानहाटनमा रहेको फ्रेन्चाइज मुभी हल एएमसीमा गरिएको थियो भने दोश्रो शो कुइन्सस्थित बम्बे थिएटरमा गरिएको छ ।
सन् १९२० मा स्थापना भएको ९९ बर्ष पुरानो मुभी हल एएमसीमा पहिलो पटक नेपाली चलचित्र ‘छ माया छपक्कै’ प्रर्दशन गरिएको थियो । आयोजकका अनुसार डिसेम्बर दुई तारिख सोमबारकादिन समेत भव्य प्रर्दशन भएको छ । हिँउ र पानी परिरहेको प्रतिकुल मौसमका बीचमा समेत अत्याधिक दर्शकले यो चलचित्र हेरेका छन् । यस्तै न्यूयोर्कको पहिलो शो मा दर्शकहरुले उभिएर चलचित्र हेरेका थिए भने केही प्यासेजमा समेत बसेर फिल्म हेरेका थिए । साथै केही सिट नपाएर फर्केका थिए । पहिलो प्रर्दशनका बेला चलचित्रकी नायिका केकी अधिकारी समेत दर्शकसंगै बसेर चलचित्र हेरेकी थिइन् ।
आयोजकले भनेका छन्, हामीले अपेक्षा गरेको भन्दा धेरै दर्शकहरुले एएमसी र बम्बे थिएटरमा चलचित्र हेर्नुभयो, नेपाली चलचित्रलाई माया गर्ने न्यूयोर्क तथा आसपास क्षेत्रका दर्शकहरुप्रति हामी आभारी छौं । चलचित्रका कलाकार दिपकराज गिरी, दिपाश्री निरौला, केकी अधिकारी र निर्मााता रोहित अधिकारीले सामाजिक संजाल फेसबुकबाट अमेरिका तथा न्यूयोर्क क्षेत्रका दर्शकले देखाएको मायाप्रति धन्यवाद ज्ञापन गरेका छन् ।
नेपालमा दर्शकको मन जित्न सफल चलचित्र ‘छ माया छपक्कै’ अहिले अमेरिकाभर भव्य प्रर्दशन भईरहेको छ । आयोजक रवि गौतमका अनुसार न्यूयोर्क राज्यमा अन्य शो गर्ने बारेमा तयारी भईरहेको छ । गौतमले दर्शकको माग अनुसार अर्को शो छिट्टै गरिने जानकारी दिए । आयोजकका अनुसार यदी ठुलो समुह बनाएर या कुनै संघ सस्थाले चलचित्र देखाउन चाहेमा फिल्म बितरकसंग सम्पर्क गर्न सक्नेछन् । दिपेन्द्र लामा निर्देशित गम्भीर राजनीतिक बिषयमा हास्यप्रधान ढंगले प्रस्तुत गरिएको चलचित्र छ माया छपक्कैको कथा पनि निर्देशक लामाले नै तयार पारेका हुन् ।
चलचित्रमा दीपकराज गिरी केदार घिमिरे, जितु नेपाल, केकी अधिकारी लगायतका कलाकारको अभिनय रहेको छ । आमा सरस्वती मूभिज, रोहित अधिकारी फिल्मस र आईएमईको संयुक्त ब्यानरमा बनेको चलचित्रको पटकथा दीपकराज गिरीले तयार पारेका हुन् ।