अमेरिकाको उत्तरपूर्वी क्षेत्रमा हिउँको कम्बल, २० इन्चसम्म हिमपात, ७७० उडान रद्द
प्रकाशित मिति : मंसिर १६, २०७६ सोमबार
सोमबार अमेरिकाको उत्तरपूर्वी क्षेत्रले हिउँको कम्बल ओढेको छ । न्युयोर्क, न्युजर्सी लगायतका कैयन क्षेत्रमा दिनभर हिमपात भएको छ भने कतिपय क्षेत्रमा राती अबेरसम्म हिमपात हुने अनुमान गरिएको छ ।
मासाचुसेट्स, न्यु ह्याम्पशायर, भर्मोन्ट, मेन लगायतका स्थानमा हिमआँधीको चेतावनी दिइएको थियो भने बोस्टन लगायतका क्षेत्रमा ४ देखि ८ इन्चसम्म हिमपात भएको छ । ती क्षेत्रमा मंगलबार यो मात्रा अझ दोब्बर हुने अनुमान गरिएको छ ।
न्युयोर्क राज्यको मध्य न्युयोर्क र अल्बानीमा सबैभन्दा धेरै हिमपात भएको छ । अल्बानी नजिकै साराटोगा काउन्टीमा २० इन्चसम्म हिमपात भएको छ भने अल्बानीमा १३ इन्चसम्म हिमपात भएको छ । उक्त क्षेत्रमा मंगलबार विहानसम्म थप ५ देखि १० इन्च हिमपातको अपेक्षा गरिएको छ ।
सोमबार रातीसम्म न्युयोर्क सिटी र लंग आइल्याण्डमा ४ इन्चसम्म हिमपात हुने अनुमान गरिएको छ । कतिपय क्षेत्रमा १० इन्चसम्म समेत हिमपात हुने मौषमविदको भनाई छ ।
सोमबार पेन्सिलभेनियादेखि मासाचुसेट्ससम्म हिमपातका कारण विद्यालयहरु बन्द भए भने न्युयोर्कका गभर्नर एन्ड्रयु कुमोले आज अल्बानी लगायतका क्षेत्रमा संकटकालको घोषणा गरेका छन् । उनले हिउँ हटाउनका लागि ३ सय कर्मचारी परिचालन गरेको बताएका छन् ।
हिमपातका कारण सोमबार अमेरिकामा ७७० हवाई उडानहरु रद्द भएका छन् । ती मध्ये अधिकांश उडानहरु न्युयोर्क र बोस्टनका थिए ।
उता पोर्टल्याण्डमा सोमबार दिउसोसम्म २ इन्च हिमपात भएको छ । मंगलबार विहानसम्म त्यहाँ ६ देखि १० इन्चसम्म हिमपात हुने अनुमान गरिएको छ ।