न्युजर्सी विमानस्थलमा बन्दुक ठानेर सुरक्षा जाँच गर्दा भेटियो बन्दुक आकारको ट्वाइलेट पेपर होल्डर
न्युजर्सीको विमानस्थलमा एकजना यात्रुलाई सुरक्षा जाँचका क्रममा बन्दुक बोकेको आशंकामा चेकजाँच गर्दा उनको झोलामा बन्दुक आकारको ट्वाइलेट पेपर होल्डरमात्र भेटिएको छ । न्युजर्सीको नेवार्क इन्टरनेशनल एयरपोर्टमा टीएसएले ती यात्रुलाई रोकेर बन्दुक भएको आशंकामा चेकजाँच गरेका थिए ।
रिभल्भर गोली घुमाउनका लागि नभएर ट्वाइलेट पेपर घुमाउनका लागि बनाइएको भन्दै टीएसएले सामाजिक सञ्जालमा पोष्ट गरेको थियो । झोला एक्सरे मेसिनबाट पार गराउँदा बन्दुक आकारको उक्त बस्तु बन्दुक जस्तै नै देखिएको थियो ।
बन्दुक र बन्दुक जस्तै देखिने बस्तु ह्याण्डक्यारीमा लैजान नदिइने टीएसएले स्पष्ट पारेको छ । बन्दुक आकारको उक्त बस्तु बोकेका यात्रुलाई विभिन्न विकल्पहरु दिइएको थियो । या त उक्त बस्तु गाडीमा फर्काउन, लगेजमा राख्न, यात्रा नगर्ने अरु साथीलाई दिन वा टीएसए समक्ष बुझाउन यात्रुलाई विकल्प दिइएको थियो । यात्रुले टीएसएलाई नै बुझाउने विकल्प रोजेका थिए ।
