राजाका अंगरक्षकको हत्या
प्रकाशित मिति : आश्विन १३, २०७६ सोमबार
साउदी राजा सलमानका अंगरक्षकलाई उनकै एक साथीले गोली हानेर हत्या गरिदिएका छन् । आपसी विवादपछि जनरल अब्देल अजिज अल फागमहालाई आफ्नै साथी ममदोह बिन मेसल अल अलीले शनिबार साँझ गोली हानेको प्रहरीले जनाएको छ ।
फागमहाको अस्पतालमा लैजाने क्रममा मृत्यु भएको हो । अलीको घरमा पुगेका फागमहाको सामान्य विवादपछि हत्या भएको थियो । अलीले आफ्नो घरबाहिरबाट गोली ल्याएर राजाका अंगरक्षकको हत्या गरेका थिए ।
आक्रमणकारीको प्रहरी कारबाहीमा मृत्यु भएको छ । गोली आक्रमणमा अन्य सातजना घाइते भएका छन् । घाइते हुनेमा पाँच सुरक्षाकर्मी र दुई सर्वसाधारण छन् । जनरल फागमहा साउदीमाझ लोकप्रिय थिए । उनी तत्कालीन राजा अब्दुलाहका पनि निजी अंगरक्षक थिए । सामाजिक सञ्जालमा उनलाई ‘नायक’ र ‘एन्जिल’ भन्दै धेरैले प्रशंसा गरेका छन् ।