समाजवादी पार्टी अमेरिकामा बिस्तार, एमाले र माओवादीको मिसावट कोदो र तोरीको जस्तै
प्रकाशित मिति : ५ श्रावण २०७६, आइतबार
सुरेश चाम्लिङ्ग
समाजवादी पार्टी नेपालका बरिष्ठ नेता अशोक राईले एमाले र माओवादीको एकता कोदो र तोरीको मिसावट जस्तोमात्रै रहेको बताउनुभएको छ । अमेरिकामा रहेको भातृ संगठन नेपाली समाज अमेरिकाको बिस्तारित भेलालाई बोस्टनमा सम्बोधन गर्दै नेता राईले कोदो र तोरी हेर्दा उस्तै भएपनि मिसावटपछि काम नलाग्ने भन्दै कोदो मात्र भए त्यसको रोटी वा ढिडो बनाउन मिल्ने र तोरी मात्र भए तेल निकाल्न सकिने भएपनि कोदो र तोरी मिसाएर न त तेल निकाल्न मिल्ने न त ढिडो पकाउन मिल्ने बताउनुभएको छ ।
उहाँले भन्नुभयो – ‘कोदो र तोरीको मिसावटको दुइ तिहाइ सरकारबाट नेपाली जनताले न रोटी न तेल नै पाउछन् । अर्थात बिकाश र समृद्धि यो सरकारबाट सम्भव छैन ।’
संबिधान संशोधनको उदेश्यले प्रधानमंत्रीसंग दुइ बुंदे लिखित सम्झौता गरेर पार्टी सरकारमा गएको र त्यसको पालना नभए आफूहरु सरकारमा बस्नुको औचित्य नभएको उहाँले बताउनुभयो ।
उहाँले भन्नुभयो – ‘संबिधानमा मौलिक हक सम्बन्धि धाराहरु अत्यन्त राम्रा छन् । तर पहिचान ,भाषा,धर्म जस्ता सवालमा यो संबिधानले विभेद गरेको छ । यो संबिधान चौराशी व्यंजनमा झिंगा परेको जस्तो भएको छ । संविधान संशोधन गरेर हिमाल पहाड तराइ सम्पूर्ण जनताको भावनालाइ समेट्नु आजको आवस्यकता हो । यसको नेतृत्व अब समाजवादी पार्टी गर्छ ।’
कार्यक्रममा समाजवादी पार्टी नेपालकी केन्द्रिय सदस्य शुशिला श्रेष्ठले विदेशमा बसेर दुख गरि रहनु भएका नेपालीहरुको आवाज नेपालमा सुनिने भन्दै आफ्नो गाउँघरतिरका व्यक्तिलाई पनि समाजवादी पार्टीबारे बुझाउन अनुरोध गर्नुभयो । कार्यक्रममा एनआरएनए अमेरिका पूर्व अध्यक्ष शिब कुमार राइ, नेपाली समाज न्युयोर्कका महासचिव लोक चेम्जोङ्ग, सदस्य केशव राम राई लगाएतले सम्बोधन गर्नु भएको थियो ।
भेलाले न्युहेम्प्शायर, म्यासाच्युसेट्स, कनेक्टिकट, भर्मन, मेनको समिति गठन गरेको छ । उक्त न्यु इंग्ल्याण्ड समिति सुरेश चाम्लिङ्गको अध्यक्षतामा गठन गरिएको हो । जसमा उपाध्यक्ष प्रकाश परियार, महा सचिव दिपक डंगोल, सचिव शेखर राई, सदस्यहरु चन्द्र राई, गीता श्रेष्ठ, भरत देवान लगायत रहनुभएको छ ।
