राज्यकाे ढुकुटीमा १० महिनाकाे अायात धान्ने विदेशी मुद्रा, तिर्न बाँकी ऋण साढे ८ खर्ब
प्रकाशित मिति : जेष्ठ १४, २०७५ सोमबार
सरकारले चालु आर्थिक वर्ष २०७४/०७५ को समग्र स्थितिको मूल्यांकनसहितको आर्थिक सर्वेक्षण सदनमा पेश गरेको छ ।
अर्थमन्त्री युवराज खतिवडाले अाइतबार प्रतिनिधिसभाको बैठकमा चालु आर्थिक वर्षको हालसम्म भएका आर्थिक गतिविधि तथा समग्र आर्थिक अवस्थासहितको सर्वेक्षण पेस गर्नुभएको हो ।
सर्वेक्षणअनुसार चालू आर्थिक वर्षको मूल्यवृद्धि ६ प्रतिशतमा कायम रहने र आर्थिक बृद्धि ५ दशमलव ९ रहने अनुमान छ । सर्वेक्षणअनुसार कूल ग्राहस्थ उत्पादनको १५ प्रतिशत रकम बचत छ ।
चालु आर्थिक वर्ष २०७४/०७५ को मौद्रिक नीतिमा वार्षिक उपभोक्ता मुद्रास्फिति ७ कायम राख्ने लक्ष्य लिएकोमा चालु आर्थिक वर्षको ९ महिनामा यस्तो मुद्रास्फिति ४ प्रतिशत १ प्रतिशत रहेको छ ।
नियमित विद्युत आपूर्तिका कारण आन्तरिक उत्पादन क्षमतामा आएको वृद्धि, आपूर्ति व्यवस्थामा भएको सुधारका कारण चालु आर्थिक वर्षमा मुद्रास्फिति प्रक्षेपित सीमाभन्दा कम रहेको हो ।
६० लाखभन्दा बढि गरिवीको रेखामुनि रहेको जनाएको सर्वेक्षणमा सरकारी खर्च बढेर बजेट घाटा बढ्न थालेको, सेयर बजार स्थिर रहेको र बैंक तथा वित्तीय संस्था कर्जा बृद्धिदरको तुलनामा निक्षेपको वृद्धिदर कम रहेको औंल्याएको छ ।
बैंकमा निक्षेप २४ खर्ब र कर्जा २२ खर्ब पुगेको आर्थिक सर्वेक्षणमा उल्लेख छ । गत आर्थिक वर्षमा ३७ मध्ये २६ संस्थान नाफा कमाउन सफल भएको र ११ घाटामा गएको आर्थिक सर्वेक्षणले औंल्याएको छ ।
शोधानन्तर स्थिति ऋणत्मक देखिए पनि राज्यको ढुकुटीमा सञ्चित विदेशी मुद्राले दस महिनाको आयात धान्न सक्ने र २०७४ फागुन मसान्तमा देशको कुल तिर्न बाँकी सार्वजनिक ऋण ८ खर्ब ४३ अर्ब रहेको आर्थिक सर्वेक्षणमा उल्लेख छ ।