एसाइलमको नयाँ नियमका दुई फाइदा, दुई बेफाइदा
अमेरिकी सरकारको युएससीआईएसले ल्याएको एसाइलम अन्तरवार्ताको नयाँ नियमले कैयनलाई फइदा गर्नेछ भने कैयनलाई बेफाइदा हुनेछ । युएससीआईएसले अन्तरवार्ताको मिति तय गर्दा सबैभन्दा पछाडि फाइल गरिएका एसाइलमका आवेदनको अन्तरवार्ता सुरुमा गर्नेगरी विगतको प्राथमिकता उल्टाएको छ । अब नयाँ आवेदकको अन्तरवार्ताको मिति २१ दिनभित्रै दिइनेछ ।
१, नयाँ नियमबाट एसाइलमका लागि वास्तविक रुपमा योग्य नयाँ आवेदकलाई फाइदा पुग्नेछ । यदि कुनै व्यक्ति वास्तविक रुपमै पीडित हो भने र त्यो व्यक्ति एसाइलमका लागि योग्य हो भने उसले २१ दिनभित्रै एसाइलमको अन्तरवार्ताको मिति पाएर उसको आवेदनमा छिटो फैसला हुनेछ । यसो गर्दा उसले छिटो अमेरिकी ग्रिनकार्ड प्राप्त गर्न र परिवारका सदस्यहरुलाई अमेरिका ल्याउन सक्छ ।
२, नयाँ नियमबाट एसाइलमका लागि वास्तविक रुपमा योग्य पूरा आवेदकलाई बेफाइदा हुनेछ । किनभने उनीहरुले दुईदेखि तीनबर्षदेखि एसाइलमको अन्तरवार्ताको मिति कुरेर बसिरहेका छन् । छिटो अन्तरवार्ता भएर केस टुंगोमा पुग्ने आशामा रहेका उनीहरुको अन्तरवार्ता मिति अब अझै केही बर्ष नआउने देखिएको छ । छिटो ग्रिनकार्ड पाउने र परिवारसँग भेट्ने उनीहरुको सपना अझ पर पुगेको छ । जसका कारण वास्तविक रुपमा योग्य एसाइलमका पूराना आवेदकलाई यसबाट ठूलो बेफाइदा भएको छ ।
३, एसाइलमको केस बलियो नभएका वा जित्ने सम्भावना नभएका तर एसाइलम गरेर केस पेन्डिङ रहेको आधारमा वर्क परमिट प्राप्त गरेर काम गर्ने आशय भएका नयाँ आवेदकहरुलाई भने नयाँ नियमले बेफाइदा पुग्नेछ । एसाइलमको लुपहोललाई उपयोग गरेर वर्क परमिटमात्र प्राप्त गरेर दुईचारबर्ष कानुनी रुपमा अमेरिकामा काम गर्ने आशय राखेका नयाँ आवेदकहरुले अब युएससीआईएसमा एसाइलम पेन्डिङ रहेको आधारमा वर्क परमिट प्राप्त गर्ने सम्भावना अत्यन्तै न्यून रहेको छ । त्यसैले दुईचारबर्ष वर्क परमिट लिएर काम गरिहालौं, पछि देखा जायगा भन्ने आशयका साथ एसाइलम फाइल गर्नेहरु अब दुरुत्साहित हुने भएका छन् ।
४, एसाइलमको केस बलियो नभएका वा जित्ने सम्भावना नभएका तर एसाइलम गरेर केस पेन्डिङ रहेको आधारमा वर्क परमिट प्राप्त गरेर काम गर्ने आशय भएका पूराना आवेदकहरुलाई भने नयाँ नियमले फाइदा पुग्नेछ । किनभने अब केस पेन्डिङ रहेको आधारमा उनीहरुले अझै थप केही बर्ष वर्क परमिट प्राप्त गर्न सक्नेछन् । उनीहरुको अन्तरवार्ताको मिति आउन अझ ढिलाई हुने भएकाले उनीहरुले अझै केहीबर्ष ढुक्कसँग काम गर्न पाउनेछन् । उनीहरुका लागि एसाइलमको नयाँ नियमले अमेरिका बसाई अझ लम्बाइदिएको छ ।
समग्रमा नयाँ नियमले एसाइलम अन्तरवार्ताको मिति छिटो आइदिओस् भनेर कुरेर बसेका पूराना आवेदकलाई वेफाइदा भएको छ भने अन्तरवार्ताको मिति छिटो चाहने नयाँ आवेदकलाई फाइदा भएको छ । साथै अन्तरवार्ताको मिति छिटो नआओस् भनेर बसेका पूराना आवेदकलाई फाइदा भएको छ भने नयाँ आवेदकलाई बेफाइदा भएको छ ।
