अमेरिकी राष्ट्रपति ट्रम्पद्वारा ‘एआई जार’ र ‘एआई फोर्स’ गठन गर्ने घोषणा
तस्बिर: जुलिया डेमारी निकिन्सन / एपी/रासस
अमेरिकी राष्ट्रपति डोनाल्ड ट्रम्पले एक सामाजिक सञ्जाल पोस्टमार्फत नयाँ आर्टिफिसियल इन्टेलिजेन्स सल्लाहकार नियुक्त गर्ने र “एआई फोर्स” गठन गर्ने योजना बनाएको बताएका छन्। ट्रम्पले यस पदलाई “एआई जार”को रूपमा सम्बोधन गरेका छन्, यद्यपि उनले यी पहलहरूको कार्यान्वयन वा विवरणबारे थप प्रष्ट पारेका छैनन्।
वासिङ्टनका सांसदहरूमा एआई प्रविधिले मानव र सम्पत्तिमा पार्न सक्ने जोखिमलाई लिएर चिन्ता बढ्दै गएको छ। यसै महिनाको सुरुमा पूर्व एन्थ्रोपिक शोधकर्ता ज्याकब कक्सनले भनेका थिए, “एआई निर्माण गरिरहेका मानिसहरू स्वयम् नै यो प्रविधिले यो दशकको अन्त्यसम्ममा हामी सबैको विनाश गर्न सक्छ भन्ने कुरामा विश्वास गर्छन्।” तर, ट्रम्पले एआईसम्बन्धी चिन्ताहरूलाई निरन्तर बेवास्ता गर्दै अतिरिक्त नियमनको आवश्यकता नरहेको तर्क गर्दै आएका छन्।
ट्रम्पले आफ्नो सामाजिक सञ्जाल प्लेटफर्म ‘ट्रुथ सोसल’ मा लेख्नेका छन्, “हामी यो अद्भुत उद्योगको विकासलाई कुनै पनि हालतमा बाधा पुर्याउने वा रोक्ने छैनौँ। बरु, यो बढ्दै जाँदा हामी यसको सम्मान गर्नेछौँ, सहयोग गर्नेछौँ र हेरचाह गर्नेछौँ। यद्यपि, हामी सम्भावित गलत क्रियाकलापहरूमाथि पनि नजर राख्नेछौँ, जुन हाम्रा विद्यमान फौजदारी र देवानी न्याय प्रणालीमार्फत सजिलै गर्न सकिन्छ।”
यदि ट्रम्पले यो प्रतिबद्धता पूरा गरे भने, उनको कार्यकालमा यो दोस्रो ‘एआई जार’ नियुक्ति हुनेछ। यसअघि भेन्चर क्यापिटलिस्ट डेभिड स्याक्सले यस भूमिकामा काम गरेका थिए। उनले वसन्त ऋतुमा पदबाट राजीनामा दिई बाह्य सल्लाहकारको भूमिकामा सरेएका थिए।
स्याक्सले पनि नयाँ एआई नियमनप्रति ट्रम्पको जस्तै असहमति व्यक्त गर्दै आएका छन्। बुधबार एक कार्यक्रममा बोल्दै स्याक्सले एआई विकासकर्ताहरू नै आफ्ना उत्पादनहरूको सुरक्षाका लागि जिम्मेवार हुनुपर्ने र समस्या आएमा उनीहरूलाई नै जवाफदेही बनाउन सकिने भएकाले नयाँ संघीय नियमहरूको आवश्यकता नरहेको बताउनुभएको थियो।
ह्वाइट हाउसले भने ट्रम्पको यस पोस्टबारे तत्काल कुनै प्रतिक्रिया दिएको छैन।
ट्रम्पको यो घोषणा चिनियाँ राष्ट्रपति सी जिनपिङसँग हुने आगामी बैठकभन्दा केही अघि आएको हो। वासिङ्टन र बेइजिङबीच एआईको नेतृत्वलाई लिएर तीव्र प्रतिस्पर्धा चलिरहेको छ, जसलाई दुवै सरकारले आफ्नो आर्थिक र सैन्य शक्तिका लागि महत्त्वपूर्ण मान्छन्। अत्यधिक नियमनले अमेरिकी एआई विकासलाई ढिलो बनाउने र चिनियाँ प्रतिस्पर्धीहरूसँग प्रतिस्पर्धा गर्ने क्षमता कमजोर पार्ने ट्रम्प र प्रविधि क्षेत्रका कार्यकारीहरूको तर्क छ, जसलाई सुरक्षा अधिवक्ताहरूले भने अस्वीकार गर्दै आएका छन्।
यसैबीच, अमेरिकी अर्थमन्त्री स्कट बेसेन्टले एआई सुरक्षा, व्यापार र अन्य आर्थिक मुद्दाहरूमा छलफल गर्न आइतबार न्युयोर्कस्थित जेपी मोर्गन चेसको मुख्यालयमा चिनियाँ उपप्रधानमन्त्री हे लिफेङसँग भेटवार्ता गर्ने कार्यक्रम रहेको छ।