१३ नेपालीको हत्या सहित एक दर्जनभन्दा बढी घटनामा संलग्नलाई अमेरिकामा २० वर्ष जेल
भर्जिनियाको रिचमन्डस्थित अमेरिकाको भर्जिनियाको पूर्वी जिल्लाको जिल्ला अदालतको भवन। तस्बिर: अमेरिकाको भर्जिनियाको पूर्वी जिल्लाको जिल्ला अदालत, सार्वजनिक डोमेन।
अफगान नागरिक मोहम्मद सरिफुल्लाहलाई आतंकवादी संगठनलाई भौतिक सहयोग र स्रोत उपलब्ध गराउने करिब १० वर्ष लामो षड्यन्त्रमा संलग्न भएको अभियोगमा २० वर्ष जेल सजाय सुनाइएको छ। उनीमाथि इस्लामिक स्टेट अफ इराक एन्ड अल–शाम–खोरासान प्रोभिन्स (आईसीस–के) का सदस्य रहेको अभियोग लगाइएको थियो।
अमेरिकी न्याय मन्त्रालयका अनुसार सरिफुल्लाहले २०१६ देखि २०२५ मा पक्राउ पर्नुअघिसम्म आईसीस–केका एक दर्जनभन्दा बढी आतंकवादी आक्रमणमा विभिन्न भूमिकामा काम गरेका थिए। तीमध्ये २०१६ मा काबुलस्थित क्यानाडेली दूतावासको सुरक्षा गरिरहेका नेपाली सुरक्षा गार्डलाई लक्षित आत्मघाती बम विस्फोट पनि रहेको छ।
अमेरिकी न्याय मन्त्रालयका अनुसार जुन २०, २०१६ मा आईसीस–केको तर्फबाट काम गरिरहेका एक आत्मघाती हमलाकारीले अफगानिस्तानको राजधानी काबुलमा क्यानाडेली दूतावासको सुरक्षा गरिरहेका नेपाली सुरक्षा गार्डहरूलाई लक्षित गरी बम विस्फोट गराएका थिए। विस्फोटमा १३ जना नेपाली सुरक्षा गार्डको मृत्यु भएको थियो।
सुरक्षा गार्डहरू क्यानेडियन दूतावासतर्फ गइरहेको एउटा मिनीबसमा चढेका थिए। उनीहरू राजधानी काबुलमा बिहानको ट्राफिकबीच यात्रा गरिरहेका बेला एउटा कम्पाउन्डभित्र रहेको आत्मघाती बम हमलाकारी मिनीबस नजिक आएको थियो। सो समयमा बस सर्वसाधारणले किनमेल गरिरहेको बजार क्षेत्रबाट गुज्रिरहेको थियो।
हमलाकारी आत्मघाती बेल्ट लगाएर पैदलै त्यसको नजिक पुगेको थियो। त्यसपछि उसले अज्ञात उपकरण प्रयोग गरी मिनीबस नजिकै आफूलाई विस्फोट गरायो। विस्फोटका कारण गाडीका झ्यालहरू उडे । यस विस्फोटमा परी मिनीबस गुडिरहेको बजारमा रहेका धेरै सर्वसाधारण पनि घाइते भए। दूतावासभित्र रहेका सबै व्यक्तिहरू भने सुरक्षित थिए।
आक्रमण हुनुअघि सरिफुल्लाहले आत्मघाती हमलाकारीका लागि आवश्यक निगरानी गरेको र त्यसपछि उनलाई आक्रमणस्थलसम्म पुर्याएको अमेरिकी अदालतमा प्रस्तुत प्रमाण र अभिलेखमा उल्लेख छ। सरिफुल्लाहलाई सन् २०२१ को अफगानिस्तानको काबुलस्थित हामिद कारजाई अन्तर्राष्ट्रिय विमानस्थलको एबे गेटमा भएको आत्मघाती बम विस्फोटमा पनि संलग्न रहेको अमेरिकी न्याय मन्त्रालयले जनाएको छ।
अगस्ट २६, २०२१ मा अमेरिकी तथा अन्य गठबन्धन सेनाले विमानस्थलबाट गैर–लडाकुहरूको उद्धार गरिरहेका बेला एबे गेटमा हजारौँ सर्वसाधारण जम्मा भएका थिए। अमेरिकी सरकारका अनुसार आईसीस–केको नेतृत्वले सरिफुल्लाहलाई विमानस्थलतर्फ जाने सडकमा निगरानी गर्न र तालिबानका जाँच चौकीबाट बाटो सुरक्षित रहेको सुनिश्चित गर्न जिम्मेवारी दिएको थियो। करिब दिउँसो २ बजे उनले तोकिएको बाटोको निगरानी गरेर बाटो खुला रहेको जानकारी आईसीस–के नेतृत्वलाई दिएका थिए।
त्यसको केही घण्टापछि करिब साँझ ५ः३६ बजे आईसीस–केका सदस्य अब्दुल रहमान अल–लोगारीले एबे गेटमा शरीरमा बाँधिएको आत्मघाती बम विस्फोट गराएका थिए। अमेरिकी न्याय मन्त्रालयका अनुसार विस्फोटमा १३ जना अमेरिकी सैनिक तथा करिब १६० सर्वसाधारण मारिएका थिए। अल–लोगारीलाई सरिफुल्लाहले यसअघि अफगानिस्तानको जेलमा सँगै रहेका बेला चिनेको पनि अमेरिकी सरकारले जनाएको छ।
सरिफुल्लाह सन् २०२४ को मार्चमा मस्कोस्थित क्रोकस सिटी हलमा भएको आक्रमणसँग पनि जोडिएका छन्। मार्च २२, २०२४ मा आईसीस–केसँग सम्बद्ध बन्दुकधारीहरूले क्रोकस सिटी हलमा आक्रमण गरेका थिए। अमेरिकी न्याय मन्त्रालयका अनुसार सरिफुल्लाहले आक्रमणकारीहरूलाई एके शैलीका राइफल तथा अन्य हतियार प्रयोग गर्ने तरिकाबारे निर्देशन दिएका थिए र आक्रमणका क्रममा उनीहरूसँग सम्पर्कमा रहेका थिए। आक्रमणमा एक सयभन्दा बढी सर्वसाधारण मारिएको अमेरिकी न्याय मन्त्रालयले जनाएको छ।
अमेरिकी अदालतमा प्रस्तुत प्रमाणअनुसार सरिफुल्लाहले २०१६ देखि २०२५ सम्म आईसीस–केका विभिन्न आतंकवादी गतिविधिमा निगरानी गर्ने, आत्मघाती हमलाकारीलाई ओसारपसार गर्ने, हतियार ओसार्ने तथा सफा गर्ने, संगठनका सदस्यहरूबीच सन्देश आदानप्रदान गर्ने र विस्फोटका भिडियो बनाएर प्रचार सामग्री तयार गर्ने लगायतका काम गरेका थिए।
अमेरिकी न्याय मन्त्रालयका अनुसार उनी करिब १० वर्षसम्म आईसीस–केको आतंकवादी गतिविधिको महत्वपूर्ण कडीका रूपमा सक्रिय थिए। एफबीआईको वासिङ्टन फिल्ड कार्यालयले अनुसन्धान गरेको यस मुद्दामा अमेरिकी न्याय मन्त्रालयको राष्ट्रिय सुरक्षा महाशाखा र भर्जिनियाको पूर्वी जिल्लाका सरकारी वकिलहरूले अभियोजन गरेका थिए।
एफबीआईको आतंकवाद प्रतिरोध शाखाका सहायक निर्देशक जारोड ब्राउनले एबे गेटमा भएको आक्रमण अफगानिस्तानमा अमेरिकाबाट हजारौँ माइल टाढा भए पनि अनुसन्धानकर्ताहरूले सरिफुल्लाहलाई अमेरिकी भूमिमा ल्याएर अमेरिकी अदालतमा जवाफदेही बनाएको बताएका छन्। मुद्दा भर्जिनियाको पूर्वी जिल्लाको अमेरिकी जिल्ला अदालतमा चलाइएको थियो।
अमेरिकी न्याय मन्त्रालयका अनुसार सरिफुल्लाहलाई सन् २०२५ मा पक्राउ गरिएको थियो। बुधबार सुनाइएको सजायअनुसार उनले अब २० वर्ष संघीय कारागारमा बिताउनुपर्नेछ।