अमेरिकामा महान्यायाधिवक्ता नियुक्ति विवाद: रिपब्लिकनकै विरोधले ट्रम्पलाई समस्या
प्रकाशित मिति : १४ श्रावण २०८३, बिहिबार
फोटो: एपी/रासस
अमेरिकी राष्ट्रपति डोनाल्ड ट्रम्पले महान्यायाधिवक्ता (अटर्नी जनरल) पदका लागि आफ्ना उम्मेदवार टोड ब्लान्चको नाम अस्थायी रूपमा फिर्ता लिन सकिने संकेत दिएका छन्।
ट्रम्पले आवश्यक परे ब्लान्चको नाम पछि पुनः मनोनयन गर्न सकिने बताएका छन्। रिपब्लिकन पार्टीभित्रैका दुई प्रभावशाली सिनेटरबाट भइरहेको विरोधका कारण ट्रम्पले यो निर्णय गरेका हुन सक्ने अनुमान गरिएको छ।
ट्रम्पले आफ्नो सामाजिक सञ्जाल ‘ट्रुथ सोसल’ मार्फत लेख्दै टेक्सासका सिनेटर जोन कोर्निन र नर्थ क्यारोलिनाका सिनेटर थम टिलिसले “सही निर्णय नगरे” ब्लान्चको नाम अस्थायी रूपमा फिर्ता लिएर उनीहरू पदबाट बाहिरिएपछि पुनः मनोनयन गर्ने बताए।
तर राजनीतिक विश्लेषकहरूले यस्तो निर्णय आफैँमा जोखिमपूर्ण हुन सक्ने बताएका छन्। आगामी वर्ष सिनेटको शक्ति सन्तुलन परिवर्तन भएमा ब्लान्चको अनुमोदन अझ कठिन बन्न सक्ने आकलन गरिएको छ।
ब्लान्चको मनोनयनलाई लिएर ट्रम्प प्रशासन र केही रिपब्लिकन सांसदबीच विवाद चर्किएको छ। विवादको मुख्य विषय १.८ बिलियन डलरको “एन्टी–वेपनाइजेसन फन्ड” र ट्रम्प तथा उनका परिवारलाई करसम्बन्धी सरकारी अनुसन्धानबाट संरक्षण दिने सहमति हो।
सिनेटर कोर्निन र टिलिसले उक्त कोष खारेज गर्न तथा करसम्बन्धी सम्झौतामा संशोधन नगरेसम्म ब्लान्चको पक्षमा मतदान नगर्ने स्पष्ट संकेत दिएका छन्। उनीहरूको समर्थनबिना ब्लान्चको मनोनयन अगाडि बढ्न नसक्ने अवस्था छ।
कोर्निनले ब्लान्चको मनोनयनमा आफूहरू मात्र असन्तुष्ट नभएको दाबी गरेका छन्। उनले भने, “एन्टी–वेपनाइजेसन फन्ड र सम्झौताको दायराबारे चिन्ता गर्ने हामी दुई जना मात्रै होइनौँ।”
उनका अनुसार रिपब्लिकन पार्टीभित्र अरू पनि सांसदहरू उक्त विषयमा असन्तुष्ट छन्।
ट्रम्पले कोर्निन र टिलिसमाथि आक्रोश पोख्दै उनीहरूको राजनीतिक जीवन आफूले नै जोगाएको दाबी गरेका छन्। यद्यपि कोर्निनले ट्रम्पको आरोप अस्वीकार गरेका छन्।
कोर्निनले ब्लान्चसँग सम्झौता हुन सक्ने अवस्था रहे पनि ह्वाइट हाउसकै केही उच्च अधिकारीहरूले त्यसमा अवरोध गरिरहेको आरोप लगाए।
कोर्निनले ट्रम्प परिवारसँग सम्बन्धित सयौँ कम्पनीमध्ये कुन–कुन कम्पनीलाई उक्त कर संरक्षण लागू हुने भन्ने विषय पनि स्पष्ट गर्न माग गरेका छन्।
तर यस्तो संशोधन गर्न ट्रम्प स्वयं असन्तुष्ट हुन सक्ने भएकाले ब्लान्च कठिन परिस्थितिमा परेका छन्।