आप्रवासी श्रमिक घट्दा ओरेगनका कृषि, होटल र निर्माण क्षेत्रमा संकट
प्रकाशित मिति : १३ असार २०८३, शनिबार
Photo:Documerica/ Unsplash
अमेरिकी इतिहासकै सबैभन्दा ठूलो देश निकाला अभियान चलाउने चुनावी प्रतिबद्धताका साथ सत्तामा आएका राष्ट्रपति डोनाल्ड ट्रम्पको प्रशासनले आप्रवासन कानुन कार्यान्वयनमा तीव्रता दिएको छ। प्रशासनका ‘बोर्डर जार’ टम होमानले पोर्टल्यान्ड जस्ता आप्रवासीमैत्री सहरहरूलाई लक्षित गर्ने चेतावनी दिएका छन्।डिपार्टमेन्ट अफ होमल्यान्ड सेकुरिटीका अनुसार सन् २०२५ मा ६ लाख ७५ हजारभन्दा बढी मानिसलाई देश निकाला गरिसकिएको छ भने २० लाखभन्दा बढी मानिसहरू आफैँ आफ्नो देश फर्किएका छन्।
यस अभियानको सीधा असर ओरेगन राज्यमा पनि देखिन थालेको छ। सरकारी तथ्याङ्क अनुसार गत वर्ष ओरेगनका राज्य र स्थानीय निकायहरूमा संघीय अधिकारीहरूबाट आप्रवासनसम्बन्धी अनुरोधहरूमा २६५% ले वृद्धि भएको छ।
ओरेगन राज्यका मुख्य अर्थशास्त्री कार्ल रिक्काडोन्नाका अनुसार आप्रवासनसम्बन्धी कडा कदमहरूको प्रभाव उपभोक्ताको खर्च गर्ने बानी र विभिन्न प्रमुख उद्योगहरूमा देखिन थालेको छ। यद्यपि, यसको पूर्ण आर्थिक क्षतिलाई अहिल्यै अंकमा मापन गर्न भने सकिएको छैन।
आप्रवासनसम्बन्धी कारबाहीको प्रभाव समुदायहरूमा उपभोगको ट्रेन्ड वा औद्योगिक क्षेत्रको गतिविधिमा स्पष्ट रूपमा देखिँदैछ, रिक्काडोन्नाले भने, “यसले हाम्रो समग्र समष्टिगत अर्थतन्त्र र राजस्वको अनुमानमा ठूलो अर्थ राख्छ।
यो असर ऐतिहासिक रूपमा आप्रवासी श्रमिकमा निर्भर रहने कृषि क्षेत्रमा मात्र सीमित छैन। रिक्काडोन्नाका अनुसार खुद्रा व्यापार, किराना पसल, होटल, रेस्टुरेन्ट, निर्माण क्षेत्रका साथै ओरेगनका मुख्य पहिचान मानिने काठ, वन पैदावार र उत्पादन क्षेत्रमा समेत यसको गम्भीर प्रभाव परेको छ।
गत ग्रीष्म ऋतुमा भएको चेरी खेतीको फसल संकलन र अन्य क्षेत्रमा देखिएका तनावहरूले यसको पुष्टि गर्छन्, उनले थपे।
गैर-दलीय कङ्ग्रेसको बजेट कार्यालयको प्रतिवेदन अनुसार सन् २०२३ मा भएको आप्रवासीहरूको आगमनले राज्य र स्थानीय सरकारहरूलाई करिब १० अर्ब डलर कर राजस्व योगदान पुर्याएको थियो। तर, सोही अवधिमा सरकारहरूले विद्यालय, आश्रयस्थल र सीमा सुरक्षा जस्ता सेवाहरूमा झन्डै १९ अर्ब डलर खर्च गर्नुपरेको थियो।
अर्कोतर्फ, सीबीओको प्रक्षेपण अनुसार सन् २०२३ देखि सुरु भएको आप्रवासीहरूको आगमनले सन् २०३४ सम्ममा अमेरिकाको श्रम शक्तिमा ५८ लाख मानिस थप्नेछ र आगामी दशकमा देशको आर्थिक उत्पादनलाई करिब ९० खरब डलरले बढाउनेछ।
अर्थशास्त्री रिक्काडोन्नाले आगामी दिनमा कर र राजस्वको थप तथ्याङ्क प्राप्त भएपछि ओरेगनको अर्थतन्त्रमा परेको वास्तविक प्रभावको चित्र अझ स्पष्ट हुने बताएका छन्।